Vawiin (June 1) chawhma dar 11:00 khan tun hnaia India ram pum huap Sub Junior Hockey Tournament-a champion Mizoram Girls Hockey team te lawmpuina hun Mizoram State Sports Council chuan a hmang a, he hunah hian Pu R.Vanlalvena, MLA, Chairman, ZOHANCO chu  khuallian a ni.

May 18-26, 2015 chhung khan Ranchi-ah  5th Sub-Junior Hockey India National Championship 2015 (Women) Division B neih a ni a, he championship-ah hian Mizoram Hockey team chuan final-ah Hockey Patiala chu 9-0 a hnehin an champion.

Mizoram State Sports Council chuan lawmpuina hun anmahni office, Infiammite Inpuiah hmangin he huna khuallian Pu R.Vanlalvena MLA chuan "India ram ropui taka champion nih theih hi a ropui a, a hrechiang apiangin a ropui zia an hria. Mizoten hruaitu tha tak kan neih tak avangin infiamna lamah hma kan sawn em em a, hmasawn zel tur leh Mizoram tihmingthatu ni zel turin vawiina kan infiammite hi duhsakna ka hlan a ni" a ti.

Khuallian chuan, " Kalphung fel tak kan neih a ngai a, nikhata darkar 24 hun awmah hian infiam hun te, lehkha zir hun te, thil hrang hrang tih dan tur Routine fel tak kan neih a ngai. Zuk leh hmuama insum ngaih thu hi sawi ngai a ni tawh lova, insum theihna, taihmakna leh chhelna kan mamawh a ni" tiin hruaitu tha tak nei Mizoram Girls Hockey team lawmpuina leh fuihna thu a sawi.

Mizoram Sub Junior team hian an match hmasa berah 16-0 in Vidharbha an hneh a, hemi hnu hian 29-0 in Uttarakhand an sawp. An hmachhawn leh tur Goa an inlan lova, semifinal lutin Chandhigarh 3-2 in an hneh leh a, final-ah Patiala chu 9-0 in an sawp leh ta a ni.

Mizoram Womens Hockey Association chuan an player te hnenah lawmpuina Rs.1000/-  theuh an hlan a, an pawl President Lalrampari  chuan Rs.1000 theuh player te hnenah a hlan ve bawk.