World No Tobacco Day 2015 chu vawiin khan Lal Thanhawla Auditorium, Treaury Square ah Chief Minister Pu Lal Thanhawla hoin urhsun taka hman a ni. A thupuiah ‘Stop Illicit Trade of Tobacco Products’ (Dan kalha Vaihlo leh Vaihlo atanga thilsiama sumdawnna bansan rawh).

Chief Minister chuan vaihlo zuk leh hmuam hi kan hriselna tichhe theitu anih bakah kan nunna min laksak theitu a ni a ti a. Vaihlo zuk leh hmuam hi thil sual crime a ni tiin, sorkarin meizuk khapna hmun a siama zu luite chu man theitu ruatte bakah police zawng zawngin man thei tura ngaihtuah a ni ang a ti a. Mizoram mipuite 67% hi zuk leh hmuama fihlimlo kan ni a, India rama a sang ber kan ni hial ang a ti a. Ringtu ni si hrisel ber awm tak, cancer ngah ber kan ni hi a chhuanawm loa, zuk leh hmuam kan ti nasa lutuk hi a chhan lian tak a ni ngei ang a ti a. Fai leh thianghlimna kawngah tan kan lak angai hle a ni a ti. Health care ah hrim hrim hian kan la hnufuala, tan kan lak hle a pawimawh tak zet a ni a ti.

Chief Minister chuan zuk leh hmuam hi puar leh fanna pawh nilo, a thlawna sum khawralna chauh ani a. Heti chunga zuk leh hmuama kan insen hreh loh laia pawisa ka neilo kan ti thin hi inbihchiannan hmang ila a duhawm hle a ni a ti a. Zuk leh Hmuam hlauhawmna hi la puandarh deuh deuha, la tlangau chhohpui zel ala tul hle a ni a ti a. Central sorkar chuan tuna sikret kawma vaukhanna leh sikret zuk hlauhawmna milem tarlan pawh hi hei aia ti langsar turin thupek chhuah a nih tawh thu a sawilang bawk a ni.

Chief Minister chuan Indian Society on Tobacco & Health Mizoram Chapter (IIST-M) leh Mizoram State Tobacco Control Society (MSTCS) inkawpin zuk leh hmuam dona an kalpuinaa World Health Oganisationin chawimawina leh lawmman a pek hi mipui, tlawmngai pawl hrang hrang leh mediate thlawpna tha tak an dawn vang a ni a, a lawmawm tak meuh a ni a ti.

IIST(M) President Pi Lal Riliani chuan vaihlo hi do tham a awm a, do ala ngai hle a ni a ti a. An pawl IIST(M) din tirh anih kum 1989 chho velah hriat a hlawhlo hle tih a sawi a. Mahse tha thlah miah lova kal chho zelin tunah chuan hma kan sawn tawh hle a, a lawmawm hle a ni a ti.

MSTCS Nodal Officer cum Project Coordinator Dr.R.Jane Ralte chuan WHO atang lawmman an dawn chungchang sawiin, lawmman dawng tur hian mimal leh pawl anga vaihlo dona mual hrang hrang, research, capacity building, promotion of policy or legislation leh advocacy to enhance tobacco control ah te a hlenchhuaktu an nih angaih thu a sawi a. Lawmman an dawn hi Regional Director’s Appreciatio Award niin joint Public Private Partnership anga IIST(M) nen hlan an ni a ti a. An ni bakah hian Bangladesh mi 2, Thailand mi, Delhi sorkar leh Punjab sorkara State Tobacco Control Cell ten an dawng bawk a ni a ti. An lawmman dawn bakah hian lawmman dang Hqrs World No Tobacco Day 2015 Award a awm bawk a ni. Lawmman te hi thuziak, Citation leh memento a ni.

World No Tobacco Day hi World Health Organisation hian kum 1987 May ni 31 atang khan kumtin khawvel pumah hman thin a ni a. Kumin 2015 hi Chawlhni (Sunday) ah a tlak avangin Mizoramah chuan vawiin thawhtanni hian hman ani ta a ni.

Inkhawm hi Pu Lalhmingthanga, IAS, Secretary, Health & FW in a kaihruai a ni.