Vawiin khan Lunglei District Tobacco Control Cell leh National Programme for Prevention & Control of Cancer, Diabetes, Cardiovascular Diseases & Stroke buatsaihin Lunglei Saikuti Hall-ah ‘World No Tobacco Day 2015’ hman a ni.

World No Tobacco Day inkhawm Lunglei CMO Dr.VLMS Dawngliana kaihhruaiah Khuallian YMA Sub-Hqrs. Lunglei President Pu R.Lalnunthara chuan thu sawiin Dan lova vaihlo tawlh ruk chu tih tawp a ngai a, Mizo hnam tana hnawksak vaihlo lakah kan inven leh fihlim theih dan inzirtir uar a tul hle a ni, a ti. Vaihlo leh vaihlo kaihhnawih thilte chu mihringin kan hmelhriatna a lo rei tawh hle a, do rem pawh a harsa ang, amaherawhchu vaihlo hian cancer natna a siam nasa a, second 6-ah vaihlo vanga thi mi 1 awm zel anga chhut a ni a. Mizoramah mipa 80% leh hmeichhia 60% ten vaihlo hmang thin nia chhut a ni a, zirlai zingah pawh 54% vel chu vaihlo lakah an filhim lova hriat a ni bawk a, chuvangin vaihlo laka kan fihlim chho deuh deuh theih nan sorkar, kohhran leh NGO te chu tanrual a ngai a ni, a ti.

Vawiin inkhawmah hian Dr. S.R. Ngurchamliana, District Focal Point NTCP chuan  ‘Stop Illicit Trade of Tobacco Products’ tih thupui sawizauna hun a hmang a. Khawvel pumah cancer vei tamna chhan chu zuk leh hmuah tih tam vang a ni a, kumtin mi maktaduai 6 vel vaihlo vanga thi an awm, a ti. Pi K.Hmingthansangi, Psychologist, NTCP Lunglei chuan ‘Cigarettes and Other Products Act 2003’ chungchnag hrilhfiahna a nei bawk a; Dr.C.Lalhlimpuii, M.O. NCD Clinic, Lunglei Civil Hospital chuan ‘Tobacco and Non-communicable Diseases’ chungchang sawifiahna hun a hman bawk a ni.

Attachment

  • Loading attachment...