No.672/2021-2022

Aizawl, the 25th May 2021: Vawiin chhun dar 1 ah khan Pu Lalchamliana, Minister, Home, DM&R, Taxation chuan tun hnaia Central Jail-a COVID-19 positive 20 lai hmuhchhuah thar an nih chungchang chu Home department, Prisons leh DM&R department hotute a sawipui a, thil awmdan te thlir hoin hma lak zui zel dan tur te an sawi ho a ni.

Pu Lalchamliana chuan Prisons department lamin Central Jail a tang awm mek te leh venthawn ngai zual staff te Rt-PCR test nei tura CMO lama dilna an thehluh tawh chu chak taka bawhzui ni se a ti a. Hetiang thil thleng hi a awm theih avangin District Jail lama thuneitute pawh theihtawpa lo fimkhur turin a chah a ni.

COVID-19 hri kai mek te vilna leh in enkawlna atana hmanraw pawimawh PPE te, mask te, sanitizer te, Pulse oxymeter leh thermometer te chu a tul anga ngaihtuah zel tura tih a ni a. Central Jail tan hian DM&R department atangin PPE 50, mask 600 leh sanitizer 5 litres pek nghal an ni bawk a ni.

Central Jail ah hian COVID-19 positive te dah hranna tur quarantine facility pawh chawpchilh takin buatsaih a lo ni tawh a. Meeting chuan hri kai an lo pun zel palh thulha ruahmanna siam dan tur an sawi ho bawk a ni. Central Jail a COVID-19 hri kai mi 20 te hi 5th May, 2021 a tang dah thar atanga kai chhawng nia ngaih an ni a; chutih rualin ward danga tang awm mek, mahni inringhlel te chu COVID-19 test neih pui thin niin hri kai dang hmuhchhuah an awm lo a ni.