Vawiin khan Home Minister Pu R.Lalzirliana kaihhruaina hnuaiaH Bru lakkir chungchangah Secretariat Conference Hall-ah meeting neih a ni a. Home Secretary Pu K.Riachho IAS, DGP Pu Lalrokhuma Pachuau IPS, Home Department senior officer te, DIG(Northern Range), SP Mamit leh DC Mamit aiawh te bakah tlawmngai pawl hrang hrang, political party hrang hrang aiawh thahnem tak an tel bawk a ni.

Home Minister Pu R.Lalzirliana chuan meeting koh chhan chu Sorkar tum dan inhriattir nan leh NGO leh party hrang hrangte lungrual tak leh fimkhur taka hemi chungchang kalpui leh sawiho tura inrawnkhawm nan anih thu a sawi a. Home Ministry in Sakhan Tlang dunga Mizo chhungkua 83 raltlan te chhawmdawlna pek a remti avangin Mizoram Sorkar chuan Tripura Refugee Camp hrang hrang atanga Bru lakkir hna a lo chawlh lailawk chu tan a rem tih leh anih thu a tarlang a.

Meeting-ah hian Bru lakkir dinhmun leh Sakhan tlang dunga Mizo raltlan chungchang te sawiho a nih bakah rawtna hrang hrang te sawiho a ni bawk. April thla a Bru lakkir hna hi tan leh tum a ni a. Bru chhungkaw lakkir zawng zawng hi May 2011 thleng khan chhungkaw 799 niin a mihring zawng chuan mi 4119 an ni.