Vawiin khan Home Minister Pu R.Lalzirliana chuan Pitarte Tlang Republic Venga Indoor Stadium sak thar ‘Hawla Indoor Stadium’ tih a hming sak chu a hawng. Hawnna inkhawm ah hian Sports Minister Pu Zodintluanga; AH & Vety. Minister Pu N K Chakma; Parliamentary Secretary Pu Lal Thanzara; Lunglei HPC Chairman Pu Joseph Lalhimpuia; Pu R Lalrinawma, Pu K Lianzuala leh Pu John Siamkunga te an tel a ni. Sports Association hrang hrang hruaitute an tel bawk a ni.

Home Minister in Stadium a hawn zawha inkhawm tawite Stadium 1st Floor-ah buatsaih ah chuan Indoor Stadium changtlung tak hawn theih a awm leh North East Games vawi-16 naah hman theih a awm chu lawmawm a tih thu a sawi a. Hemi atan bultumtu ber Sports Minister Pu Zodintluanga’n Stadium ah puitling theih nan chak taka hma a lak vanga leh a inpumpekna leh AH & Vety Minister Pu N K Chakma’n Stadium sak nan Vety Department ram a pek chu fakawm a tih thu Home Minister hian a sawi bawk a ni. Pu R Lalzirliana chuan Stadium thar hian Mizo thalaite ah hriselna tha, hunawl hman thatna zirtir, ruihhlo leh zuk leh hmuam kalsan leh infiamna lamah thiamna sang zawk a thlen theih ngei a beisei tih a sawi.

Pu Hawla hian Sikul leh College-ah hockey, football leh badminton te lo khel in, captain te a lo ni tawh thin a. Chu mai bakah National Level Football leh Hockey inelna ah te Assam aiawhin a tel thin tawh bawk a. Aijal Sports Association ah Secretary hna te lo chelhin, ama hovin Mizoram Sports Association, Mizoram Football Association leh Mizoram Hockey Association te din niin heng pawl President te a lo ni tawh a. Mizoram State Sports Council leh Mizoram Olympic Association te pawh a kaihhruaina hnuaia din a ni.

Indian Olympic Association-ah Executive Council Member a ni a, North_East Olympic Commission-ah Chairman atan ruat a ni bakah Indian Olympic Association ah Ex-officio Vice President a bi bawk a ni. Government of India national Sports Policy 2001 duangtu Committee-ah member a ni bawk a ni.

Hawla Indoor Stadium hi kum 2008 khan NLCPR sum hmaga sak tan a ni a. Stadium satu hi M/S Suvidha Infrastructure Guwahati niin cheng vaibelchhe 9.18 velin tender hi an chang a. Stadium a hian floor pali awmin, a vaia covered area zau zawng chu 432.065 sqm a ni a. Basement II ah hian motor 9 dahna tur a awm a. Basement II ah hian Table Tennis Hall, Martial Arts Room, infiammi te tana inthlakna pindan leh inthirna te a awm a. Ground Floor ah hian Gymnasium, infiammi te tana inthlakna pindan leh inthirna te leh a. First Floor ah hian Basket Ball/ Badminton Hall leh gallery a awm a ni.