Vawiin khan Home Minister Pu R.Lalzirliana hovin a office ah sorkar mi pawimawh ten tun hnaia sorkar-in Kelkang-a mipui vantlang harsatna sutkianna tur ruahmanna a kalpui te an thlir ho va. Finance Minister Pu Lalsawta, State Planning Board Vice Chairman Pu H.Liansailova, NIB leh NABARD, Mizoram Regional Office hotute pawh an tel a ni.

Tarlan tawh thin angin Kelkang-ah hian Mizoram sorkar chuan NLUP sum bank interest hmangin vantlang inthiarna khur paihfai leh a thar sak belhna tur te, Kelkang khaw chhunga street light vuah leh tawngtaina tlanga electric eng pekna tur te, tui supply leh a khawlna tuizem dahsakna tur te, khaw mipuite eizawnna tur atan te hmanhmawh takin ruahmanna eng emaw zat a siam a. Hengte hi bawhzui a nih dan meetingah hian ngaihthlak a ni a. Tukin thlengin ek in khur 56 paih fai a ni tawh a, a dang 200 vel sak belh tura sorkarin ruahmanna a siam chu a khaw hmunhma in a zo dawn lo niin a lang. Chhungkaw 212 tan vawkvulh, 16 tan arvulh leh chhungkaw 8 tan eichawp dawr siamna tur tanpuina ruahman a ni a. Chhungkaw 236 hnenah tuizem pek turin ruahman a ni bawk.

NABARD sum hmanga Kelkang khaw tui lakna leh kawng siam na turin project lian tham zawk buatsaih  a ni dawn a. Aizawl leh Kelkang inkar a direct bus, maxi-cab leh taxi service duh te tan Transport department chuan special permit a pe thei bawk a ni.

Home Minister chuan Kelkang tana sorkar ruahmanna siamte tluang taka kalpui mek a nih avangin a buaipuitu department hrang hrang te bakah kohhran leh pawl ang tea tha leh hun sengtute chungah lawmthu a sawi a. Sorkarin a tih tur a tihna ah tumahin a kawi zawnga la a, sawisel an awm lo chu  Kelkang Harhna an hlutzia tilang tu a ni, tiin mihring leh sorkar hmangin chung lam hnathawh a lo lang a ni, a ti.