Vawiin chawhma dar 10:00 khan P&E Veng Community Hall, Serchhip ah State Council of Educational Research and Training (SCERT) leh District Education Office, Serchhip tangkawp buatsaihin zirlaite tan " Career Conference" buatsaih a ni a; Resource Person pahnih Pi Caroline Zoramthangi, Vocational Guidance Officer leh Pi Lianhlupuii Hnamte, Lecturer, SCERT  ten hmanpuiin, Serchhip khawpui chhunga High School paruka Class-X zirlai 300 chuang an tel a ni.

Vawiin a 'Career Conference' hi Pu Lalrammawia, Principal, DIET, Serchhip in kaihruaiin Pu Zohmingthanga, District Education Officer chu khuallian a ni a, DEO Pu Zohmingthanga chuan zirlai kalkhawmte chu degree nei tura BA/MA passed ringawt tum lova an hnathawh tur leh an tuina kawnga thawk thei ngei tura thiamna nei turin a chah a; an zirlai bakah an rilru leh taksa tibuai a tichhe thei thil chi hrang hrang laka inthiarfihlim thin turin a chah a ni. Reource Person te'n zirlaite fuihna hun leh kawng kawhmuhna hun hmangin zirlaite chu anmahni an inhriatchian a pawimawh thu te, mahni inhriatchianloh vanga kan nih tur ang kan nih loh fo thin thu leh pawl sawm an zawh hnu a an zirtur subject thlan chungchangah pawh fimkhur taka ngaihtuahna sen a tul thu te, taimakna leh tumruhna, tawrchhelna a pawimawhzia te sawiin naupang ten an hmalam huna an hnathawh theih tur chi hrang hrang kawhhmuhna (career talk) benglut tak sawiho a ngaihthlak a ni.