Vawiin khan Lawngtlai AH & Vety Complex ah NLUP Second Phase hnuaia vawk vulh thlangtu chhungkua 126 te hnenah vawkte pali theuh leh a chaw man tur pawisa fai Rs 34950/- theuh pek an ni.

NLUP tanpuina semna inkhawm kaihruaitu Dr. Lalnunhlima Ralte, DVO chuan, vawk sem chhuah chu Second Phase hnuaia vawkte semchhuah hnuhnung ber leh a zawhna a nih thu leh Lawngtlai Town leh a chhehvel khuate hnenah pek an nih tur thu sawiin, District chhung hmun dangte chu pek fel vek tawh an nih thu a tarlang. Tanpuina dawngtuten dik taka an kalpui leh kalpui loh enzui reng an nih tur thu sawiin dik taka kalpui lo kan hmu a nih chuan tanpuina pawisa dawn tur la awm chu pek zui an nih a rin loh thu a sawi a, a dawngtute chu dik taka hnathawk turin a chah a ni.

NLUP vawkte hi Lawngtlai District Information and Public Relations Officer Pu K. Saitluanga, MIS, chuan a dawngtu turte hnenah a hlan a, Calendar of Work in a kawhhmuh anga an pawisa dawnte vawkchaw man atana dik taka hmang theuh tur leh NLUP dawngtu mi hlawhtling thlanchhuahte zinga tel pha nih tum theuh turin a chah a ni.