Vawiin chawhnu dar 1 khan Pu R. Lalzirliana hovin mi pawimawhten Krismas leh Kumthar vuakveta mipuite himna tur relin an thu khawm.
Sorkarin a lo khap tawh angin Kristiante hunpui Krismas lawm lai vela Halpuah leh halmawi chi reng reng Mizorama lakluh khap a ni a; Department hrang hrang Gate duty te pawhin uluk taka bungraw lut tur lo enfiah zel tura hriattir an ni.
Mipui tana tha tur sorkarin khapna dan a puante hi ngun taka bawhzui a nih theih nan YMA te pawh ngen an ni a; Central YMA hruaituten Branch tin a zawm tura an hraittirna hmu lo palh an awm pawhin, khaw tina YMA te chu theihtawpa sorkar tawiawm tha turin ngen an ni.
December 31, 2011 zana thalaite tana intihhlimna, Aizawl khawpui leh District khawpuiah DC kaihhruainain YMA ten lo huaihawt theuh tura beisei an ni a; heta intihhlimna buatsaihtute tihphurna tura sum senso tur hetiangin sorkarin a ruahman:
Aizawl khawpui chhunga hmun 5: Kulikawn, College Veng, Dinthar Veng, Chanmary, leh Zemabawk leh Lunglei tan Rs 60,000 theuh pek an ni ang a; District khawpui dang 6-ah Rs 50,000/- theuh pek an ni ang.
Hetianga sorkarin khawpuia intihhlimna a buatsaih chhan hi thalai rualten a huhova intihhlimna an neih hian interek leh sualna tam tak punlun thin venna tura tih a ni.Heng intihhlimna hmun hi zan dar 10-ah tan theuh tura beisei an ni a; CYMA hruaitute leh mi pawimawh ruatten a hawnna an hmanpui ang a; District Magistrate leh Police hotuten heng hmunte hi tlawh kual tur magistrate leh Officer ruat ten an tlawh kual bawk dawn a ni.
Sorkarin a duh ber chu kan hunpui Krismas leh kumthar vuakveta mipuite hlim tlanna tur leh himna tur an ngaihtuah a ni. Kan that tlanna tura sorkar hmalakna te pawi sa a, hlim taka Krismas hmang theuh turin mi zawng zawng duhsakna an hlan bawk a ni.
