Mission Antyodaya (Gram Samridhi Evam Swachhata Pakhwada) hnuaia hmalakna thlirhona leh, he Pakhwada hun chhunga hma la tha khua, Block leh District te hnena lawmman hlanna hun vawiin khan Rural Development Minister Pu R. Lalzirliana hovin Mizoram Legislative Assembly Conference Hall-ah neih a ni. He hunah hian Minister of State Pi Vanlalawmpuii Chawngthu, Deputy Chief Whip Pu R.L. Pianmawia, Aizawl South-II bialtu MLA Lt. Col. (Rtd.) Z.S. Zuala, leh Chalfilh bialtu MLA Dr. Ngurdingliana te an tel bawk a ni.

Minister Pu R. Lalzirliana chuan BPL chhungkua te tan a thlawna thil sem leh man man zawka thil hralh te a awm thin avangin hun hma lamah kha chuan mahni thawhchhuah nilo hamthatna dawn pawi ti lova BPL nih duhna rilru a awm thin a, hun kal zelah BPL chhungkua nih zahthlak zia kan hre chho ta in kan harhchhuak ta zel hi a lawmawm in, Mission Antyodaya chu a hlawhtlin ngei ka beisei a ni, a ti a. Hmalakna kengkawhtu te zinga sulsutu pawimawh ber pakhat chu BDO te niin, rinawm leh thahnemngai taka an hna an thawk thin ta chu lawmawm a tih thu sawi bawkin, mipuite mamawh, a bik takin mi harsa te mamawh ngai pawimawh zel turin a chah a ni. Minister chuan hmasawnna leh changkanna kawng zawh naah hian hriselna tello chuan hmasawnna a tluantling lo a ni tiin, ei  leh in uluk a tul thu te a sawi a. Hriselna leh faina leh thianghlimna inkungkaih dan chu thil hriatchian viau tawh a nih rualin, mi taima tan lo chuan a fai tak tak theihloh thu sawi bawkin, sorkar hmalakna te hlawhtlinna tur atan mipui tawiawmna a pawimawh thin thu leh, chumi atan ke pen theihna tur kawng pawimawh tak pakhat chu taimak leh nunphung hrisel a ni, tiin kalkhawmte a chah a ni.

Mission Antyodaya hi Sorkar laipuia Ministry of Rural Development in kum 2022 ah India chu mi rethei awm tawhlohna ram a siam a tumna hmalakna niin, hmalakna hmasa atan kum 2019 ral hma ngeiin ram puma thingtlang khaw singnga (50,000) thlanchhuahte chu BPL awm tawhlohna a siam turin bul tan mek a ni a. Mizoramah chuan Rural Development Department kaltlangin khaw 183-ah kalpui mek a ni a; heng khuate hian sawrkarin an khua hmasawn nana ruahmanna a siamte an lo hriat a, anmahni zawna mawhphurhna an neih vete hlen chhuah tuma tan an lak ve theih nana zirtirna atan Gram Samridhi Evam Swachhata Pakhwada (Village Well-Being and Cleanliness Fortnight) chu ruahman niin, October 1- 15, 2017 chhung khan hman a ni a. Hemi chhung hian nitin awl lova hmalak leh hna thawh dan tur duan niin, report thehluh zel a ni a; sorkar department hrang hrangte nen tangkawpa thawhho a ni a, faina leh thianghlimna bakah kawng hrang hranga hma lak a ni.

Vawiin programme-ah hian Gram Samridhi Evam Swachhata Pakhwada hman a nih chhunga tehfung hrang hrang hmanga endik an nih hnu a hma la tha ber khua thlanchhuah takte hnenah lawmpuina thuziak leh pawisafai - pakhatna tan cheng singnga, pahnihna tan cheng singthum, pathumna  tan cheng singhnih, pek ni a. Lawmman hi khuallian Minister Pu R. Lalzirliana leh khualzahawm Pi Vanlalawmpui Chawngthu ten an hlan a. District hma la tha ber chu Serchhip niin, pahnihna chu Lawngtlai District a ni a. Block hma la tha ber chu East Lundar niin, pahnihna chu Thingsulthliah a ni a, pathumna chu Hnahthial leh Thingdawl an ni. Khua hma la tha ber chu Leng khua niin, pahnihna chu Darlawng a ni a, pathumna chu Ailawng leh Rawpui ten intawm a. Heng lawmman bakah hian he Pakhwada hun chhunga Management Information System (MIS) lama hma la tha ber district atan Mamit District chu thlan niin, MIS hnuiah vek hian Block titha ber pahnih thlan an ni a, chungte chu Reiek RD Block leh E. Lungdar RD Block an ni. Consolation prize sawm siam a ni bawk a, citation leh pawisafai cheng singkhat theuh pek niin, a dawngtu khua te chu Chhippui, Saichal, Lungsen-II, Suangpuilawn, Thingdawl, Sihhmui, Bualpui NG, Piler, Hmunhmeltha leh Lianpui an ni.

Vawiin programme-ah hian Pu Lalhmingthanga, RD Department Secretary chuan kalkhawmte lawmna thu sawin, Mission Antyodaya chu Mizoramah a hlawhtlin ngei theih nan khawtlang hruaitute leh mipui an tanrual zui zel a duh thu leh, an hmalaknate chu lawmawm a tih thu a sawi a. Pu CC Lalchhuangkima, RD Dept. Secretary chuan Mission Antyodaya chungchang leh lawman dawngtute thlanchhuah an nih dante sawiin hun a hmang a, Pi K. Lalrinzuali, Additional Secretary, RD Dept. chuan lawmthu sawiin hun hi a khar a ni. Vawiin programme ah hian Department dang atanga sawm bik te bakah BDO te leh V/C te an kalkhawm a ni.