Vawiin khan Home Minister Pu R. Lalzirliana hovin a Office Chamber-ah Mizoram Police, Excise & Narcotics Department hotulu leh Central YMA hruaitute chu thukhawmin Mizoram a lo thianghlim zawk nan  te, khawlai len vel a lo nawm theih zawk nan te, dan lova ruihtheih thil tawlhru leh zuar thin te leh rui thinte thenfai dan tur an sawiho a, hemi chungchanga Sawrkar, a bik takin Police, Excise & Narcotics leh CYMA te inkarah thawhhona tha zawk a awm theih dan kawng hrang te sawi hovin Ruihlo Do Kawnga inpuihtawn dan tur puanzarna chu August ni 5 ah Aizawl leh District Headquarters-ah te neih nise tih an rel a ni.

Meeting ah hian Ruihhlo do kawnga Sawrkar leh YMA thawhhona dan kawng hrang hrang chhawpchhuahte chu zau  taka sawiho a ni a. Meeting chuan thawhho na kawng hlawm lian pasarih te chu pawmin hmalak dan tur rel. Thawhho hlawm liante hi – Mizorama ruihlo hluar lutuk tihrem nan Sawrkar (Police/Excise) leh YMA-in thawhho nise, ruihhlo zuartute leh a ti thinte man chhuah a nih theih nan Police/Excise/YMA ten a tul anga inpuitawnin chak takin hma lak nise; Mizoram chhunga ruihhlo lo luhna kawng hrang hrang (Boundary) te uluk taka vilin, a phurh nan a hman lirtheite Police/Excise lamin surprise checking neih thin nise; Central/Sub-Headquarters/Group Level-a Ruihlo Do Pawl (SRS, SADS, GADS) te leh Police/Excise tena thawhhona tha neiin ruihhlo do chungchangah inpuih tawn thin nise; Sawrkar dan palzut a, ruihtheih thil leh a kaihhnawiha inhnamhnawih thinte chu YMA leh Police/Excise duty ten manin an phu tawk hremna pek ngei nise; Aizawl bikah chuan ruihhlo hluar zualna laiah tun aia chakin YMA leh Police ten hmalak tum nise; Ruihhlo dona kawnga sum leh pai tul angte phuhruk nan a tul anga sawihova, inpuih dan zawn nise; Ruihhlo in a a tihbuai chhanchhuah an nih theih nan a remchang leh theih ang anga hmalak nise tih te an ni.

Aizawl leh Mizoram khawpui dang ah te thlamuang taka mi tinte an chen ho theihna turin Mizoram Police, Excise & Narcotics Department leh YMA te inkarah thawhhona tha tak neih a, Dan loa ruihhlo zuar leh ruite thenfai Hnatlang Runpui neih an rel a; a theihna apiangah thawk ho a, in tanpui tlang a, Zoram hmai timawilo tute do tlang zel turin hma lak nise an ti a. Hemi chungchang hi Mizoram Sawrkar-in hriatpuiin, a hlawhtlin tak tak theih nan kawng tinrengah hma la se tiin meeting chuan an duh thu an sawi.