Vawiin khan GS Arya Mess, Police Headquarters, Khatla-ah police fa zirlai kum 2018 HSLC leh HSSLC exam-a titha zual distinction-a pass chin chawimawina leh lawmpuina hun hman a ni a. Home Minister Pu R. Lalzirliana chu Khuallian a ni. Police department in police fa zirlai titha an chawimawi hi a tum khatna a ni.
Khuallian chuan zirlai tithate lawmpuina hun hman a ni chu lawmawm a tih thu a sawi a. Hetiang hun hman theihna tura ngaihtuahna sengtu DGP Mizoram Pu Balaji Srivastava hnenah lawmthu a sawi a. Zirlai tithate chu fimkhur taka nun kawng dik zawh turin leh an nu leh pate hre renga, chawimawi nachang hre turin a chah a. Thawhrimna chu hlawhtlinna bul a ni tih hre reng turin zirlaite chu a fuih a ni.
DGP Pu Balaji Srivastava chuan naupang tithate a lawmpui thu sawi a. Mizoram thalai zingah talent nei tha tak tak an awm thu sawiin, hetiang lawmpuina hi zirna mai bakah infiamna leh art lama tithate hnenah hlan zel an tum thu a sawi bawk a ni.
He hunah hian Home Minister leh DGP Mizoram in zirlai tithate lawmpuina thuziak leh pawisa fai Rs. 3000/- theuh an hlan a. Hei bakah hian Pu Robert Romawia Royte chuan zirlai titha zawng zawngte hnenah Oxford Dictionary a hlan bawk. Mizoram puma police fate distinction-a pass hi HSLC mi 55 niin HSSLC ah mi 31 an ni. He hunah hian Aizawla awm zirlai 65 (HSLC 43, HSSLC 22) hnenah lawmpuina hlan an ni a, tel thei lo district dang ami te chu lawmpuina an district police hotute hnenah thawn niin anmahni remchan dana lawmpuina hun hi buatsaih tura ruahman a ni.
