No.3587/2021-2022

Aizawl, the 7th January 2022 : Vawiin khan Home Minister Pu Lalchamliana, Disaster Management & Rehabilitation enkawltu ni bawk hovin Secretariat Conference Hall, MINECO ah Covid-19 hripui dona kawnga mawhphurhna nei leh a hmatawnga thawk Department hotulu te hovin Covid-19 hripui chi thar Variant of Concern (VoC) Omicron darh chak dan dinhmun thlirin Mizoram leh thenawm ramte nena ramriah leh heng atang a lo lut a bik takin Myanmar raltan te Covid-19 testing leh screening kalpui dan leh a tul anga khuahkhirh/dahhran chungchangah te inrawnkhawmna neih a ni.

Home Minister Pu Lalchamliana chuan Covid-19 chi thar Omicron darh chak dan dinhmun thlirin ram dang nena kan ramri kana Mizoram lo lut te hi a theih chin chinah Covid-19 an vei leh vei loh test leh heng mite hriselna dinhmun chik taka endik leh a tul chuan heng mite hi dahhran a pawimawh a. Ram dang nena kan ramri atangin Omicron Mizorama a darh loh nan a tul anga hmalak dan tur sawiho leh rel chu meeting in a tum ber a ni a ti a. Home Minister in meeting thuhma a sawi hnuin Chief Secretary Dr. Renu Sharma chuan Covid-19 hripui 3rd Wave lo thleng thei dinhmun thlirin Mizoram luhka entry point a SOP hman mek chu tihdanglam anih thu te leh Health Department in uluk takin dinhmun an thlithlai reng chunga ruahmanna awmsa te a tul anga thlak te pawh an neih thu a sawi a ni.

Meeting ah hian Police, Assam Rifles leh BSF hotulu te chuan hri a darh loh nan ramri a hma an lak mek dante an sawi a. Indo-Myanmar ramri vengtu Assam Rifles chuan raltlan lo lut reng reng chu test a, khua mite nen an inchiahpiah loh nan hun enegmaw chen khunghran a tul thu sawiin hengah hian Village Council/VLTF te nen thawhhona tha tak an neih a pawimawh thu a sawi a. Tunlaia raltan lo lut tam ber chu Siaha District a Zawngling kaltlang an nih thu leh ramri kanna hmun 5/6 chu uluk leh zuala testing leh screening kalpui a tul tiin an sawi. Indo-Bangladesh ramri vengtu BSF lam chuan ramri kanna a lo lut report an nei lo tiin tun dinhmunah an ruahmanna te chu a tha tawka, harsatna engmah a awm loh thu an sawi. Meeting ah hian Myanmar ramri dep District – Siaha, Lawngtlai, Champhai, leh Hnahthial DC te chuan video conferencing kaltlangin Myanmar raltan te hriselna dihmun leh hri danna an pek tawh zat te an report a ni. Health & Family Welfare Department chuan raltlan te chu COVID-19 vaccine an pek mek thu an tarlang bawk a ni.

Meeting chuan raltlan lo lut ten COVID-19 an put darh loh nan a tul anga ruahmanna siam leh duang turin Home Secretary kaihhruaina hnuaiah, Assam Rifles, Police, Health & Family Welfare Department, DM &R Department, Siaha leh Champhai DC telna Committee din nise tih rel a ni.