No.3586/2021-2022

Aizawl the 7th January, 2022 : Hnahthial District chhunga kum 15 - 18 inkar te tan vawiin khan Electric veng, Community Hall, Hnahthial-ah Covid-19 vaccine pek tanna hun hman niin District bawrhsap Pu R.Lalremsanga chuan khuallian niin a hmanpui.

Hnahthial District Bawrhsap Pu R.Lalremsanga chuan tih dam aiin inven a that zawk thu sawiin "Covid-19 hri vangin mi tam takin nunna an chan a, kan District-ah pawh mi 7 laiin an thihpui tawh a, kan dinhmun zel tur hi hriat a nih loh avangin kan him tlanna atan Vaccine la tur hian mi zawng zawng ka sawm che u a ni" tiin Hnahthial District khaw hrang hrangah Vaccine la tura campaign an neih tawh thu leh an la kalpui zel tur thu a sawi a, "tun hnaiah kan District chhungah Covid-19 hri kai mi 5/6 vel lek an nih tawh laiin tukinah chu mi 46 kan tling chho leh a, hri kai hmuhchhuah thar tamna Tuichangral khaw hrang hrangah Vaccine la tura Campaign hi neih leh a ni ang" tiin mi thenkhat ten Covid-19 vaccine lak chu sakhuana nen sawizawm a, hlauhawm anga an sawi thin chu thil thalo tak a nih thu leh awih lo turin mitinte a chah nghal a ni.

He hun kaihruaitu Dr.R.Lalsanglura, MO, Hnahthial pawhin Vaccine lak a hlauhawm loh thu sawiin "Sorkar-in cheng tam tak sengin a thlawna min pek hi kan himna tur a ni tih hriaa kan lak ngei a tha a ni" a ti.

District Hospital Hnahthial tarlan danin Hnahthial District chhungah hian Covid-19 vaccine hi kum 18 chunglam mi 19038 hnenah First dose pek tawh niin an target atangin 96% a ni a, second dose pek hi mi 18663 niin an target atangin 94% a ni. Aithur leh Hnahthial khawchhunga Venglai chu za-ah za (100%) Vaccine pek tawhna a ni bawk. Tun tuma kum 15 - 18 inkar pek turah hian District Hospital Hnahthial huamchhungah hian mi 1550 pek turin ruahman a ni.