1033/2024-2025

Lunglei the 1^st July, 2024: Vawiin chawhnu dar 4:00 khan Home Minister Pu K.Sapdanga  kaihhruaina hnuaiah DC Conference Hall, Lunglei-ah “Ruihhlo Do” chungchang meeting neih a ni.

Ruihhlo Do Meeting-ah hian Excise Minister Pu Lalnghinglova Hmar chuan sawrkar hotute, tlawmngai pawl leh Kohhran hruaitute nen a Ruihhlo do meeting neih a tulna  chhan  sawiin; Lunglei District-ah hian engtiangin nge sawrkar hian ruihhlo  do  hi kalpui se tia Kohhran leh tlawmngai pawl ten beiseina an neih tih sawrkar chuan a hriat duh bakah, an thurawn te pawh ngaihthlak a duh a, chutiang atana vawiin meeting hi huaihawt a ni. Sawrkar chuan theitawp chhuahin Ruihhlo hi a do mek zel a, Kohhran leh tlawmngai pawl te  pawhin Ruihhlo do kawngah chak takin  hma an lak reng thin avangin lawmthu a sawi.Pu Lalnghinglova Hmar chuan a sawi zelin, Ruihlho do hi thapui chhuah tak meuh meuh a kan beih a tul tawh takzet a. Kan hmalakna hrang hrangte kan inhrilhhriat tawn theuh te pawh a tul hle a ni, a ti. Ruihhlo hian min chim nasat avangin kil thum: sorkar, tlawmngai pawl leh kohhran atanga  thapui thawh a kan do ho a tul tawh tak zet a ni, a ti. Covid hripuiin min chimbuai vanglai, sorkar pawh a chet hleih theih tawh loh lai a, kohhran leh tlawmngai pawl te hmalakna ropui tak ang kha ruihhlo dona kawngah pawh hian  hmu leh thei ila ti a, duhthu a lo sam thin thu a sawichhuak a ni.

Vawiin meeting-ah hian, Social Walfare & Tribal Affairs Minister Pi Lalrinpuii pawhin thusawiin, drug do policy duan mek a ni a. Mizoramah pawh sorkarin  cheng vaibelchhe  3 ruihhlo do nan  sanction a, Lunglei-ah pawh cheng nuai 7 pek niin; Social Welfare Department in  Master Trainer 40 a nei mek  a. kohhran leh tlawmngai pawl ten an hmang tangkai hle a ni, a ti.  Lunglei atangin mi 50 te training pek tum mek a ni a, chu chu tangkai taka hman anih theih a rinthu a sawi bawk. Nasa Mukt Abhyaan,Ministry of Social Justice hnuaiah awareness leh training neih nan  kumtin sum a lo kal thin a, District len dan a zirin sum sem thin a ni. Mizoram pumah De- Addiction Centre 50 awmin; Ministry of Social Justice and Empowerment hnuaia enkawl 10, Private enkawl 40 a awm mek bawk a ni.

Supply Minister Pu Lalchhanzova  pawh in thu sawiin; naupang ngaihsaktu neih lo hi a pawi a,  Nu leh pa leh fate inkar lo zau ta lutuk hi ruihhlo tih an tam chhan ni a a hriat thu  sawiin, Pu Chhanzova chuan  nu leh pa  leh naupang te inkawmngeih hian  ruihhlo do-na kawngah kawngro thui tak a sut  ngei a rinthu a tarlang bawk. Kan naupang te hian an chenna in nuam an ti em? nuam an tih theih nan engtia hmalak tur nge tih pawh kan inzawh nawn fo a tul tawh tak zet a ni, a ti.

Vawiin meeting-ah hian Lunglei Sub-Hqrs YMA hruaitute, kohhran hrang hrang hruaitute, MHIP, Police, Excise & Narcotics  leh District Administration aiawha kalkhawm te chuan ruihhlo do kawng an hmalak tawhna leh harsatna an tawh hrang hrang te tarlangin, sawrkar tha tihchak tur leh puibawm tura an inpeih reng thu sawiin, tanrual a tul zia pawh an tarlang bawk a ni.