1032/2024-2025

LUNGLEI; the 1^st July, 2024 : Vawiin chawhnu dar 1:00 khan Lunglei Circuit House  cheithat chu Mizoram Chief Secretary Pi Renu Sharma, IAS chuan khuallian niin a hawng.

Hemi puala inkhawm tawi neihah hian Pi Ramdinliani IAS, Deputy Commissioner, Lunglei chuan kal khawmte lawmna thu a sawi a. Circuit House hi thla tam tak chhung rim tak leh hah taka cheithat hna thawh a ni a. Nikum October thla atang khan siamthat hna hi thawh tan niin; Mizoram sawrkar atangin nikum khan ₹ 19.62 lakhs dawn a ni a, kuminah  ₹ 21.24 lakhs dawn leh a ni. Sr.EE PWD te nen estimate siamin, a structure la  hman tlak la awm te nen theih tawp chhuaha chei that hna thawh a ni a. Vawiina hawn theiha peih fel a ni chu lawmawm a tih thu a sawi a ni.

Khuallian  Pi Renu Sharma Chief Secretary pawhin thusawiin,  Lunglei DC leh a thawhpuiten Circuit House thawm thathna tha taka an thawk thei chu lawmawm a tih thu a sawi a. Circuit House Lunglei chu Mizoram History-ah hmun pawimawh tak luahtu a ni  a. Chuvang chuan thuam thata cheimawi zel hi kan mawhphurhna a ni, a ti. Mikhual thlen kawngah pawh thawktute tun aia tan la thar a, biak nuam leh hmel hlim tak pu chunga mikhualte lo chhawn thin turin a ngen.  Lunglei Circuit House thlalak hlui te chu dah that a vawng him tlat turin a chah bawk a ni.

 Pu Vanlaldina Fanai, Commissioner/Secretary GAD etc pawh in thu sawiin, Lunglei DC leh a thawhpui te hmalakna leh thawhrimna avanga Circuit House cheithat  hawn theih a ni  chu fakawm a ti thu a sawi.

Pi Malsawmhriatzuali, SDC circuit House in-charge chuan report peiin;  Circuit House cheithat hi October, 2023 ah bul tan a ni a, Mizoram sorkar atangin 1st Installment ₹ 19.62 lakhs dawn a ni a, 2^nd Installment-ah ₹ 21.24 lakhs,  avaiin ₹ 40.86 lakhs dawn a ni, a ti. Heng sum hmang hian room hrang hrang bakah Conference Hall, Dining Hall, Kitchen, Bathroom leh bulding rawnghnawih  anih thu a tarlang bawk.

Lunglei Circuit House hi kum 1901 khan sak niin 1986 thleng khan luah niin hemi kum vek hian sak that leh a ni a kum 1991 khan sak zawh niin vawiin thleng hian kan la luah mek a ni.