Vawiin khan Saitual Bazar Veng Branch YMA chuan Saitual Auditorium ah YMA Day vawi 81-na an hmang a, he hun hi bialtu MLA, Home Minister ni bawk Pu R.Lalzirliana chuan a hmanpui.

Home Minister chuan YMA member kalkhawm hma ah thu sawiin YMA chu Zoram tinuamtu, khawtlang thlamuantu a ni a ti a, YMA chu zonunmawi chhawm nung zeltu, tanpui ngaite tanpuitu anih rualin dan zahthiam kawngah fimkhur taka kal a tul a ni a ti a, YMA  chuan sawrkar Dan siam te a zah thiam rualin midangte pawh Dan zah thiam tura zirtirtu ni bawk se a duh thu a sawi a, dan leh hrai pawisak a zah thiam hi huaisenna dik tak zawk a ni a ti bawk. YMA member te chu hun vawn dik kawnga tan la thar leh zual turin a chah bawk a ni.

Home Minister hian kum 17 dawn lai bialtu MLA a an thlan tawh avangin a bial mipuite chungah lawmthu a sawi a, bial hmasawnna kawnga hna a thawhna ah mipuite tawiawmna a hmuh that avanga lawmthu sawiin mipuite hawihhawmna leh inhriatthiam tawnna hlu tak avangin hnathawh pui pawh an nuam ani a ti a, Sawrkar ah thil tih awm loh lutuk nawr ngai lo leh ngaihtuahna fim hmang thiam an ni chu mizoram mipuite tan pawh entawntlak an ni a a hriat thu a sawi bawk. Social media hman tangkai kawngah fimkhur a tul zia sawiin Home Minister chuan dawt a mimal beihnan te, midang puh hmingchhiatnan te kan hmang anih chuan dan bawhchhia kan ni dawn a, sawrkar hnathawkte phei chu an tih tur leh tih loh tur fel taka duan vek anih avangin dan anga an chunga action lak theih a ni a, an hna atanga ban thlengin hrem theih an ni a, dan hriatloh hi chhuanlam tling anih loh avangin fimkhur a ngai em em a ni a ti bawk. Hlemhletna nasa lehzuala do a tul thu pawh sawiin mipui chanai ei ni a rinhlelhte emaw sum lakluhna him lo ni a rinhlelh te kan en san ngam a tul a, khawtlanga tlaktlum beisei a therhlo eng eng emaw an tawktarh anih pawhin kan hnawl ngam a tul takzet a ni a ti bawk.

Home Minister chuan Saitual Town Area hmasawnna atan theihtawpa tan a lak thu sawiin tuin hnaiah pawh sawrkarin Zirna In leh Hostel changtlung tak tak a din thar a, heng te hi a hlawhtlina Saitual tihmingthatu anih theih nan khawtlang mipuite pawhin kan ngaihven a theihtawp kan chhuah ve a ngai a ni a ti a,  Saitual ah Hockey khelmual (Astro-Turf) tha tak nei turin chak takin hma lak mek a nih bakah Heifang khelmual pawh phullem phah tura ruahmanna kalpui a ni a, Rs. nuai 300 man Bazar In tha tak Saitualah sa turin inbuatsaih mek a ni a ti bawk. Home Minister chuan theihtawp chhuahin hma la thin mah ila kan duhkhawp a tling ngai dawn lova, chutih laiin hna a thawh chinah tha taka hna an thawh tir thin avangin ka lawm a ni a ti a, a tha zawk beisei zel chungin theihtawp chhuahin hma kan la zel ang tiin kalkhawm te hmaah a sawi a ni.

Saitual Bazar Branch YMA hnuaiah hian Section 3 awmin member 429 (mipa-296, hmeichhia-133) an awm a, nikum YMA Day leh kumin YMA Day inkarah an member 4 an sun a, kum tharah hian an Branch Silver Jubilee an lawm dawn a ni. YMA Day pual hian nimin leh vawiinah Section intihsiakna chi hrang hrang neih niin vawiin inkhawmah hian lawmman  sem a ni a, Khuallian in lawmman te hi semin tlaiah YMA Day lawmna ruai an kilho nghal a ni.

Vawiin YMA Day lawmna inkhawm hi Pu Lalhmingsanga, Barzar Branch YMA President in a kaihruai a, Pu Donny Lalruatsanga, MCS, SDO(C) leh Pu Zonunthara, VCP ten thu an sawi a, YMA member te bakah MUP, MHIP leh Village Council hruaitu ten he hun hi an hmanpui a ni.