Home Minister Pu R. Lalzirliana chuan vawiin khan Law Enforcement leh Prison official-te leh Sunrise Project in Excise & Narcotics Department Conference Hall-a State Level Consultation an neih chu a hmanpui. He consultation hi National Aids Control Organisation (NACO), FHI360 leh Mizoram State Aids Control Society (MSACS) tangkawpin an buatsaih niin, HIV/ AIDS tirem turin leh ruihhlo do kawnga dan kengkawhtute nena tangrual a thawhho dan sawiho a ni.
Minister Pu R. Lalzirliana chuan ruihhlo in kan ram nun nasa taka a tihbuai a tihchhiat zel avang hian ruihhlo hi ral do tak taka do a ngaih tawh thu leh, chu chu mitin mawhphurhna a nih thu a sawi a. Ruihhlo hman khawloh in a thlen hri thalo HIV/ AIDS tirem turin leh a vei mekte enkawl kawnga NGO hrang hrangte leh MSACS leh Sorkar programme hmanga hmalakna lo awm tawh te chu lawmawm a tih thu leh thawktute inpekna chu chhuanawm a tih thu Home Minister hian sawiin, hmabak erawh a la tam a ni, a ti a. NACO in National AIDS Program a law enforcement agency-te telh tura a hmalakna chu lawmawm a tih thu sawiin, ruihhlo do kawnga kan hmalak dan inanglo deuh te awm mahse kan thil tum a thuhmun avangin kan thiamna theuh leh theihna te inhmang tangkai tawn a, thawhhona tha tak neih ka beisei a ni, a ti a.
Home Minister chuan The Mizoram Drug Control (Substance) Bill, 2016 leh The Mizoram Drug Demand Reduction Policy, 2016 chu Assembly Session-a pharh turin Cabinet in a pawm tawh thu tarlangin, he bill puitlin tura thawktu Department-te hmalakna chungah lawmthu a sawi a. HIV/ AIDS vei tam berna zing ami state kan ni hi Sorkar laipui pawhin min vei a, a tirem tur hian keini pawh sorkar, kohhran leh tlawmngai pawl te lungrual tlang taka ruihhlo do turin kan bei zel dawn a ni, a ti.
Vawiin programme hi Dr. K. Ropari, principal Director, Health & Family Welfare Department chuan kaihruaiin, Dr. CV Dhama Rao, NACO, Ministry of Health & Family Welfare chu khualzahawm a ni a. Dr. CV Dhama Rao hian NACO chu HIV/AIDS vei ten inenkawlna tha zawk leh nun zahawm tak an nei theih nana hmalak chu a thil tum te zing ami anih thu tarlangin, HIV/AIDS hi a darh zel loh nan a vei mekte hian uluk taka enkawl an mamawh zia leh, ruihhlo ti, a bik takin inchiu thin te pawhin hriau thianghlim an mamawh thu te sawiin, inchiu thin zawng zawng hian hriua thiangjhlim hmang zel thin se AIDS vei zat hi nasa taka a tlakhniam tur thu leh, Police, Excise leh Prison lam hotute nen hemi kawnga thawhho a pawimawhzuia te a tarlang a ni.
Pu Lalrinliana Fanai, Commissioner & Secretary, H&FW Dept.; Pu Lalhmunsanga, Commissioner, Excise & Narcotics Department; Pu K. Lawmthanga, DIG, Prison; Dr. Chawnglungmuana, Director, SHALOM; Dr. Neeraj Dingra, Deputy Director General (TI), NACO leh Dr. Bitra George, Country Director, FHI360 atang te in ruihhlo tihrem leh HIV/AIDS tirem tura dan kengkawhtute mawhphurhna hrang hrangte leh ‘harm reduction’ atan hmalakna chungchangte ngaihthlak a ni a. Anni bakah hian jail tang tawh pahnih atangin an tawnhriat te ngaihthlak a ni bawk. Consultation programme hi Dr. Lalmalsawmi Sailo, Project Director, MSACS chuan lawmthu sawiin a khar a ni.
India Sorkar chuan India ram puma HIV/ AIDS titlem turin leh a bik takin a hluarna hmun bik India hmarchhak state-ah te hmalakna Project Sunrise chu kumin kum tir khan a tlangzarh a. National Aids Control Organisation (NACO) chuan State Aids Control Society-te kaltlangin he natna hrik do hna an kalpui tawh belhchhahin hmalakna dang leh kalphung dangte telh a ni a. FHI360 chuan Project Sunrise atan hian sum mamawhte a tum a ni. Manipur, Mizoram leh Nagaland ah HIV hi India state dangte aiin a hluar zawk a ni. Ruihhlo ti zinga inchiu thinte tana heng hmalakna - Needle Syringe Exchange Programme (NSEP), Opioid Substitution Therapy (OST), HIV Testing & Counselling leh anti-retroviral therapy (ART) avang te hian natna hrik inkaidarh hi a tlak hniam phah hle thu vawiin hian tarlan a ni.
