Pu Lal Thanzara I & PR Minister chuan vawiin khan I & PR Auditoriumah RTI Week,2016 a hawng. Mizoram Information Commission leh Information & Public Relation Department te buatsaih vawiin a RTI week hawnna ah hian Department hrang hrang aiawh leh misawmte an kal tha hle.

Sorkar laipui hian kum 15 chuang zet RTI alo hmang tawh a, a tangkai zia chu mipuiin kan hmu chho mek zel a ni. Mizoram pawhin a chawlhkar (week) bik anga vawi 6 hmanna kumin hian a lo ni ve thei chu lawmawm a tih thu sawiin khuallian Pu Lal Thanzara chuan a buatsaihtu Mizoram Information Commission leh Directorate of Information and Public Relations Department te fak in lawmthu a sawi.

Sorkarin mipuite hamthatna turin sum tam tak sengin programme leh scheme hrang hrang duang chhuakin a thawk thin a; hengte hi dik taka kalpui anih chuan hmasawnna tham a tling a ni. Amaherawh chu hmun tam takah a nih tur anga hman leh kalpui a nih loh avangin a tum mipuite a thlen zawh loh fo thu sawiin Minister chuan chutiang hlemhletna do na tur a sorkarin Mipuite Chanvo (People’s Right) a siam chu hriat a ngai a, chutianga Information kan neih chu mipuite’n kan chanvo, kan right a ni tih hriat reng a tul thu leh hei tak hi sorkar pawhin LANGTLANG (transparent) taka hnathawh tur a tih chamchi nachhan a ti a. Tunhma te chuan mipuiin sorkar programme leh scheme an kalpui dan engmah hriat ani ngai lo va, sorkar hnathawkte’n engpawhin rawn ti se, an chungah engmah action lak ani ngailo tih theih hial ani, tunah chuan RTI hmangin engkim deuhthaw a lo zawh chhuah theih tawh a, lang lo tura thuruk a awm ta lo ani ber tia sawiin Langtlang (transparent) sorkar siam hi sorkar duh leh tum ber a nih angin, he RTI Dan pawh hi duanchhuah ani tih hre nawn thar leh theuh turin kalkhawmte khuallian chuan a ngen nghal a ni.

Tunlai khawvel a SOCIAL MEDIA chak em em tawhzia hmutu leh hretute vek kan nih thu sawiin Pu Lal Thanzara chuan heng Facebook, Whatsapp kan tih reng ah te pawh hian THUDIK tawklo leh mipuite ti chi ai tur ang chi a inzep ve reng ani tih hriat a tul thu leh fimkhur thiam a pawimawh ani tiin Whatsapp leh FB lamah thil dik tawk lo nia hriat te hi post hmasa loin, RTI Act hmangin engkim deuhthaw a zawhfiah hmasak theih tawh a, chuvangin he Dan hman tangkai tum hmasak a tul ani a ti a.Hetih rual hian mipui lamin RTI Dan hi kan la hrechiang tawk lo pawh a ni thei tho mai. Mizoram Information Commission in theihtawpin mipui zirtir a tum hi, a lawmawm rualin sorkar department te pawhin MIC hmalakna hi duh tawk mai lovin hma lak ve a tul thu a sawi bawk.

Tunhnai maiah Central Sorkar chuan hlawh leh sum in pek danah pawh DIRECT BENEFIT TRANSFER a tih, a sum fai anga in pe tawh lova, Bank Account-ah emaw chhun fel sak mai hi a ngai pawimawh a,hei hian THAMNA (Kick-Back) ang chi pawh a tlem phah sawt ngei ngei a beisei thu leh Sorkar Department te, Public Sector organization-te leh Sorkar tanpuina dawng, Institution, Corporation leh NGO te pawh RTI Act hian a huam avangin information dil tute chu RTI Act-in a phal anga information pek hi tih ngei ngei tur a ni khuallian chuan a ti a .RTI application hi a la tlem a nih chuan, “RTI Awareness” atan tan lak chhunzawm zel a ngai hle ani tiin RTI Dan chu mitin in hriat ngei ngei tum se a duh thu a sawi.

Vawiina chawhnu lam a WORKSHOP ON RTI ACT, 2005 neih zawm nghal chu hlawkpui ngei turin RTI kaihhnawiha Department hrang hrang aiawh tu te thahnem ngai taka an tel a beisei thu leh tel ngei tura sawmin I & PR Minister chuan Sorkar thianghlim leh langtlang neih theih nan RTI Week hawnnaa tel zawng zawngte hian, mawhphurhna an neih thu a sawi a, a bik takin SPIO-te leh SAPIO-te phei chu information pe chhuak tura ‘Designated Officers’ an nih avangin an mawhphurhna a sang em em a ni a ti a. RIGHT TO INFORMATION (RTI) chawlhkar, October ni 5 atanga ni 12, 2016 chhung awh tur hi Mizoram mipuiin a tangkai thei ang bera hman turin lawm takin khuallian chuan a hawng a, RTI chungchanga Essay inziah siaka ti thate hnenah lawmman a hlan nghal bawk a ni.

Vawiin Programme kaihruaitu Pu L Hrangnawna IPS ( Rtd) Information Commissioner chuan inlawmna leh RTI kalphung a sawi a, Pu Jim K Chozah,Director,I & PR in lawmthu a sawi a. IInd Session chawhnu lamah neih chhunzawm nghal a ni a. PU Vanlalngena,Secretary, MIC in kaihruaiin Pu Vanlalvuana Dy Director ITI in RTI chungchang ah paper a present a, sawiho na in hun hman chhunzawm nghal a ni.