1845/2023-2024

Aizawl, 12.9.2023: Tui tla avanga nunna chan an lo tlem zawk nan leh mipui an lo him zawk nan Disaster Management & Rehabilitation Department chuan "State Level Seminar in Accidental River Drowning Incidents" chu Taxation Department Auditorium, MINECO ah vawiin khan Quick Response Team, Aapda Mitra, YMA leh Centre for DM, MZU te tan a buatsaih. He hunah hian Home, DM&R etc. Minister Pu Lalchamliana chu khuallian niin, district hrang hrang atangin seminar chhim tur hian an kalkhawm a ni.

Khuallian chuan Mizoramah tui tla kan awm fo thin chu pawi a tih thu sawiin, Mizo dan a ni sarih chhung bo zawnga mahni nun thapa che chhuak thinte erawh an chhuanawm in, hnam tihmingthatu an nih thu a sawi a. Vanduai hrim hrim avanga tui tla an awm rualin thenkhat chu fimkhur tawk loh vang a nih thin thu sawiin DM&R Minister chuan rui chunga tui chen te, basa ngam ringawt te leh a bik takin fur laia lui tui hlauhawm theih zia hriat loh vang te a nih thin avangin fimkhur thar a tul thu a sawi. Tui tla an awmin an tlakna bul khaw neitu mi leh sa an hah phah thin dan te sawiin Minister chuan an chungah lawmthu a sawi bawk a. Chutihrual chuan ruang zawnga theihtawp chhuah a ngaih tawh loh va, tui tla zawn tur kan awm tawh loh nan theihtawp kan chhuah tlan a pawimawh a ni, a ti.

Minister Pu Lalchamliana chuan DM&R chu department lian lo te ni mahse thawktute an thawh nasat zia sawiin, chhiatna lo thlen a chhanchhuah hna thawh kawnga tlawmngai Aapda Mitra te training a nih dan te leh, Aizawl district ah bul tan in, district tin tan training tha zawk pek tum zel a nih thu a sawi a. QRT te an thawh that thin dan sawi bawkin, anni bakah state dangin an neih ve loh YMA avanga chhiat tawh tuma nasa taka mipuiin kan tangkaipui dan te sawiin, thawhhona tha tak neih chhoh zel theih nan te, vawiin seminar chu an hlawkpui theuh nan te duhsak thu a hlan a ni.

Vawiin seminar hi thawh hnih a then niin, thawh khatna, a hawnna inkhawm ah hian Dr. Lalrokima Chenkual, Dy. Director (Trg.), DM&R chuan Mizorama tui tla thlen tawh dan (Prevalence of River Accidental Drowning in Mizoram) chungchangah zirtirna a pe a. Thawh hmasa hi DM&R Joint Secretary Pi Zarzokimi chuan lawmthu sawiin a khar a ni.

Thawh hnihnaah hian DM&R Director Pu Benjamin Lalzama kaihhruaiin tui tla chhanchhuah kawnga tawnhriat lo nei tawh hrang hrangte Central YMA, Sairang YMA Branch, Sairang Dinthar YMA Branch leh Sihhmui YMA Branch te hnen atangin thusawi ngaihthlak niin, seminar chhimtute nen sawihona neih zui a ni. DM&R Joint Director Pi Saizikpuii chuan lawmthu sawiin hun hnihna hi a khar a ni.

Vawiin seminar a tarlan angin nitin chhuak chanchinbu thenkhat atanga report lakkhawm atangin kum 2011-2021 chhung khan tui tla avanga nunna chan mi 300 chuang awm anga chhinchhiah a ni a, an zingah kum 21 atanga kum 40 inkar an tam ber a ni. World Health Organization (WHO) chuan kumtin tui tla avangin khawvel pum ah mi 360,000 thi thin niin an chhinchhiah a, chung zinga a zatve chu kum 30 hnuailam an ni. India ram bikah chuan National Crime Records Bureau in a chhinchhiah danah nikum 2021 khan rampum a tui tlak avanga nunna chan chu mi 36,362 an ni thung. Disaster Management Division, Ministry of Home Affairs chuan tui tla chu disaster ah a rin luh hleih theih loh avangin chhiatna dang thenkhata ex-gratia pek thin kha tui tla ah chuan sawrkar atang chuan a pek theih rih loh a ni.