Vawiin chawhnu khan Traffic Management Committee chu an Chairman Home Minister Pu R. Lalzirliana hovin a pisaah an thukhawm.

Meeting-ah hian AMC (Control of Parking and Collection of Parking Fees) Regulation 2012 chungchang leh hemi kaihnawih Dan leh Dun hrang hrang sawiho a ni a. Aizawl Municipal Corporation hian he Regulation siam that dan tur rawtna Committee ah hian an thlen a. Uluk taka sawiho a nih hnuah Traffic Management Committee Chairman Home Minister Pu R. Lalzirliana hovin Minister dangte, Secretary-te leh AMC hotute nen chiang lehzuala thlir ho hnuah thu tlukna siam nise tiin an rel.

Meeting hmasaa sawiho tawh internet kaltlanga taxi man tlawm hman theihna Aizawla lakluh tum chungchang report ngaihthlak niin heng company-ah hian local taxi-te pawhin an duh chuan  an inziaklut thei a, internet signal tha tak erawh mamawh a nih thu sawi lan a ni. Thutlukna erawh siam a la ni lova, Mizoram mipui tana tha leh tangkai thei ang ber tura hmalak zui zel tum a ni. 

Aizawl Traffic Jam Free hmalakna angin October ni 1, 2016 atanga kum khat chhungin Aizawl Municipal Area huamchhunga cheng, motor nei zawng zawngin garage nei vek tura hriattirna a lo chhuah tawh pawh hun tiam ral hun a hnai zel a,  tunah hian ni 180 vel a la awm tih tarlan a ni a. Hun tiam ral hma ngeia lirthei neituten garage nei hman ngei turin Committee chuan mipuite a ngen nawn leh a ni.

Traffic Management Committee ah hian Parliamentary Secretary Home Lt.Col.Z.S.Zuala bakah member dangte an kal tha hle.