Vawiin hian Serchhip DC Conference Hall ah District Development Co-ordination and Monitoring Committee (DISHA) chu an chairman Pu C.L Ruala, MP Lok Sabha hovin an thukhawm a, District chhunga Central sum hmanga hmalakna hrang hrang te an thlir hovin hmachhawp te an enlawk.

Chairman Pu C.L Ruala chuan, sawrkar laipui ruahmanna angin Central sum hmanga District chhunga hmasawnna hnathawhte hunbi neiin thlirlet (quarterly review) a ni thin a. Thutkhawm hmasaa hmalakna tur kan sawite tha taka Department hrang hrangten an thawk chu lawmawm hle a ni, a ti. Pu C L Ruala chuan, he Committee hi Ministry of Rural Development in member a rawn siam sa vekna ani a, member ten engkim tlang taka an sawina theihna tur te, inzilh leh infuih a tul ni a awm theih avangte, han inchhuahchhal deuh mai theihna hmun a nih vangtein member nilo tan telve a rem lova. News reporter ten thla an la duh a nih pawhin hun bul lama thla an lak zawh hunah min chhuah san mai ang a. Thu pawimawh, mipuite hriat tur chi chu sawrkar Information and Public Relations Officer in meeting zawhah a buatsaih mai dawn a ni, a ti.

Report-a a lan danin kum 2016-17 quarter hnuhnung ber thlenga hmasawnna report pawimawh zualte chu hetiang hi a ni. PMGSY hnuaiah Serchhip PWD chuan khaw kar kawng panga a thawk mek a, tun thlenga heng kawng laih mek dinhmun te chu Chhingchhip to Thentlang 60% zawh tawh, Hmuntha to Khawbel 50% zawh tawh, Chhingchhip to Hualtu 78% zawh tawh, Chhingchhip to Hmuntha 75% zawh tawh leh E Lungdar to Sailulak kawng 65% zawh tawh te an ni a. Heng kawng laih mekte hi kumin December thla ral hmaa thawh zawk vek tum a ni.

Power & Electricity Department hnuaia RGGVY/ Deendayal Upadhaya Gram Jyoti Yojana (DDUGJY) tia sawi zui tak hnuaia DISHA Meeting hnuhnung berin target a siam te a hun chhungin thawh zawh vek an ni a, Tuichanga Electric thlun luhna tur ruahmanna (DDUGJY) pawh contractor tura thlan hnenah LOA pek chhuah fel tawh a ni, he hna hi April, 2018 a zawh tura ruahman a ni.

National Rural Drinking Water Programme hnuaiah Khawlailung leh Khawbel tan Tuilak hna thawh a ni a, Khawbel Tuilak hi 3.3.2017 khan zawh fel a ni a. Khawlailung pawh chak taka thawh mek a ni. Swachh Bharat (Rural) hmalaknaah District chhunga thingtlang khua zawng zawng khaw 35 ah Open Defecation Free Drive neih zawh tawh a ni a, khua zawng zawngte hian ODF ah inpuangin Self Declaration pawh an siam vek tawh a ni.

National Social Assistance Programme hnuaiah District chhungah Tar Pension dawng mi 1570 an awm mek a, Hmeithai chawmna dawng mi 164 awmin Rualbanlo Pension dawng mi 47 an awm a, heng mite hi tanpui sum a lo kal veleh an Bank Account ah thun sak thin an ni. Tin, Family Benefit Schemes dawng hi 2016-17 chhungin  chhungkaw 12 an awm bawk.

Hriselna lamah; January- March 2017 inkar hian naupiang 269 zingah 5 te an boral a, Infant Mortality Rate chu 18.58% a ni. Nu nau chunga boral an awm lo thung. January-March, 2017 chhungin OPD ah mi 6167 endik an ni a, he mi hun chhung vek hian thisen 2027 endik a ni a, TB vei mi 18 enkawl niin an zinga 10 te hi an dam fel tawh a ni. Hemi hun chhung vek hian AIDS control hmalaknaah thisen 650 endik a ni a, HIV hrik hmuhchuah thar a awm lo. Hemi hun chhung vek hian school naupang hriselna endikin school 10 leh Anganwadi 27 tlawh hman niin zilar naupang 1035 te hriselna endik hman an ni.

Banking lama hmalaknaah January-March, 2017 chhung hian PMJDY hnuaiah Account hawng thar mi 352 an awm a, Adhaar Seeding hi mi 1392 in ti hmanin Atal Pension la thar mi 59 an awm bawk.

SSA hmalaknaah sawrkar Primary School 68 ah zirlai 1900 an inziak lutin, Middle School 53 ah zirlai 2609, Aided Middle School 7 ah zirlai 670, Lumpsum Aided Middle School 5 ah zirlai 488, Private Primary School 39 ah zirlai 4038 leh Private Middle School 33 ah zirlai 1589 an awm mek a. SSA hnuaia zirlai enkawl mek hi mi 11,294 an ni. School hrang hrang 6 ah Kitchen cum Store sak mek niin May, 2017 chhung hian hengte hi zawh vek hman tum a ni.

Ni za inhlawhna lamah January-March, 2017 chhungin hna chi hrang hrang 531 thawh hman a ni a, heng zinga hna 343 te hi zawh tawh niin hna kal mek 188 a la awm. Kum 2016-17 chhunga hna hrang hrang thawh zat erawh chu 979 a ni a, heng zinga 409 te hi thawh zawh tawh an ni. Tin, 2016-17 chhung hian vawiin thlengin ni 37 thawh tawh a ni a, tunhnai maiah inhlawhna tur Central lamin an rawn tichhuak leh bawk a, thawh zui nghal mai tura ruahmanna siam mek a ni. 

Mirethei in sak tanpuina Pradhan Mantri Awaas Yojana-Gramin (PMAY (Rural)) ah January-March 2017 chhungin mi 46 tan hmuh a ni a, a dawngtu turte hnenah pek mai theiha peih fel tep tawh a ni.

Border Area Development Programme (BADP) hnuaiah kum 2016-17 chhungin Rs. 266 Lakhs hmuh a ni a, E. Lungdar BDO kaltlanga thawh an ni. Hna chi hrang hrang 36 thawh nana hman niin chung zinga 16 te chu thawh zawh fel tawh an ni a. La thawh mekte pawh hi hna tam zawk zawh tawh niin reiloteah zawh fel theih mai beisei an ni.

Vawiin meeting ah hian Pi Vanlalawmpuii Chawngthu, MLA Hrangturzo bialtu, Er. Lalrinawma, MLA Tuikum Bialtu, Pi Sangchhin Chinzah, Member Secretary leh Deputy Commisioner ni bawk te, Pu V.L Remliana, PD DRDA te, District Officers te leh DISHA member te an tel kim hle a, meeting tih tawp nan Chairman Pu CL Ruala, MP ruahmanna in DISHA Serchhip member ni thin tun hnai maia min boral santu Pu T. Rosiama sun nan member te hi ngawi rengin minute khat an ding a ni.