New Economic Development Policy (NEDP) hmalakna peng pakhat, Entrepreneurship Development Scheme (EDS) hnuaia Mizoram Entrepreneurship Development Monitoring Committee (MEDMOC) in ram ei leh bar chak zawka a than theih nana mipuiah ‘entrepreneurship’ pawimawhzia sawifiah tura a thlanchhuah Entrepreneurship Master Trainer sawm(10)-te tan ni hnih (2) awh ‘Orientation Workshop’ buatsaih a. He workshop hi vawiin khan Chief Secretary Pu Lalmalsawma, MEDMOC Chairman ni bawk chuan Entrepreneurship Knowledge Centre, ZIDCO Building, New Secretariat Complex-ah a hawng a ni.
Chief Secretary chuan khawi hmunah pawh ram a than zel dawn chuan sorkar hmalakna chauh a tawk ngailo a ni, tiin ram economy chawikang tur chuan private entrepreneurship chak tak a awm tel a tul thu a sawi a. ‘Vocational course’ training neite pawh an hna hmuhna tur chu sorkar ni lovin, private company-te an nih zel avangin ram economy dinhmunah a innghah thu a sawi a. Chief Secretary chuan Sorkar in a tih tur leh a tih theih chin, mimal in an tlin loh a ti ang a, chumi rual chuan mithiam leh remhre tak tak ten ram hmasawnna atan an thiamna hmang a, leiliung ngheng a eizawnna a ni emaw, industry lam a ni emaw, service sector lam a ni emaw, ram economy thanna chu thui tak entrepreneur-te kutah a innghah thu a sawi a. Tun tuma workshop buatsaih pawh a chhimtu Master Trainer-te chuan entrepreneurship hi zau zawka kalpui a, mi tam zawkin an chhim theih dan tur te, leh harsatna hrang hrang awm theite sut tlang theih dan turte chu thahnemngai takin sawihona hunah hmang tura a duh thu a sawi a. Pu Lalmalsawma chuan Mizorama entrepreneurship tih hmasawn tura Sorkar a inhawn hle thu tarlangin, chu inpekna chu tha thei ang bera chhawr tangkai a nih theih nan Master Trainer-te thiamna leh remhriatna chu a pawimawh thu a sawi a ni.
Vawiin Workshop hawnna inkhawm hi Dr. C. Vanlalramsanga, Secretary, Planning & Alternate Chairman MEDMOC chuan a kaihhruai a. A ni hian NEDP thil tum tlangpui sawifiahna a nei bawk a. Dr. Lalrinchhana, Secretary, MEDMOC & Deputy Adviser, Planning Department chuan NEDP hnuaia Entrepreneurship Development Scheme kalpui dan tlangpui a sawifiah a ni.
Entrepreneurship Development Scheme (EDS) hi January ni 18, 2017 khan tlangzarh niin, sawrkar kum 2016-2017 chhung khan he scheme atan hian NEDP hnuaiah Cheng nuai 200 dah a ni a. Kum 2017-2018 atan Cheng nuai 500 dah leh a ni. EDS hnuaiah hian March, 2017 chhung khan district tinah Entrepreneurship Awareness neih a ni a. March ni 8-9 chhung khan Festival of Innovation, New Delhi a buatsaih chu chhim turin zirlai tirh a ni a; vawiin workshop chhimtu Master Trainer 10-te hi NTMSME, Hyderabad-ah March ni 20-24 chhung khan Training an nei tawh a, IIM Kolkata-ah Training pek leh tum a ni.
May ni 23-24 chhunga Orientation Workshop neihah hian ram ei leh bar hmasawnna tur atana thil pawimawh tak takte Master Trainer-ten presentation pein zirhona leh sawihonate hman a ni ang. Kum 2017-18 chhung hian EDS hnuaiah hian Exposure visit bautsaih te, Statr up Capital Competition-te, Business Model/ Plan siam te leh Need-Based Entrepreneurship Skill Development Programme buatsaih tum a ni.
