1628/2024-2025

Dated Lawngtlai, 16th August 2024 : Vawiin khan Pu K. Sapdanga, Home Minister chuan 3rd IR Battalion, Thingkah chu a hmunah kalin a tlawh a.  Dr. Lorrain Lalpekliana Chinzah, Lawngtlai East bialtu MLA leh Adviser to Chief Minister (Health & Family Welfare) nibawk bakah Pu R. Lokeshwaran (IPS) Superintendent of Police, Lawntlai leh Sawrkar Official ten an tawiawm a.  Administrtive Block kawtzawlah  Thlado phunna nei hmasa in, 3rd IR Battalion Conference Hall- ah inkhawmna tawi neih nghal a ni.

Pu K. Sapdanga chuan hun rei tak atanga tlawh a lo duh leh chak em em thin 3rd IR Battalion, Thingkah, a hmun ngeia a tlawh thei chu lawmawm a tih thu sawiin phal taka hmun hma tha tak petu Thingkah khawtlang hruaitute chuangah lawmthu a sawi nghal a. A hmun hma a thain a nuam hle a, chutih rualin mamawh tam tak a awm ngei dawn tih a hriat thiam thu sawiin, vawi leh khatah engkim tih theih ni lo mahse mamawh hrang hrangte chu a tul dan ang zel a ngaihtuah a tul hle a ti. A bik takin kawngpui (Main Road) atanga a pan chhohna kawng chu ngaihpawimawh hmasak a ngai hle a ti. Mizorama Armed Battalion zingah 3rd IR Battalion chu a pawimawh ber pakhat an ni tih tarlangin, Police miza, nungchang leh nihphung zirna tha leh tangkai tak a ni, a ti. Mi then khat 3rd IR Battalion -a awm inhremna ang deuha  ngai an awm thin nia a hriat thu sawiin, mimal taka tih reh a duh thu sawiin, Police te chu ram leh hnam thlamuantu ber an nih angin khawiah pawh kal leh awm thei tura rilru siamthar turin a chah.

Home Minister chuan mimal hriselna ngaihpawimawh a tul hle tih  sawiin, a bik takin Police-te chuan taksa hrisel tak an neih ngei ngei a ngai a ti a. Rilru leh taksa hrisel neilo te tan Police hna thawh a harsa hle a, hriselna ngaipawimawh turin a chah a. Uniform hak laia meizuk emaw zu ruih chu thil dik lo hulhual a ni tih sawiin Pu K. Sapdanga chuan Police mi leh sa reng reng zuk leh hmuam, zu leh  ruihho laka fihlim tlat turin a chah a. Police Sports Meet pawh buatsaih leh tum a ni tih tarlangin, hei hian a tum ber chu Police-  te inkarah inlaichinna leh inpumkhatna tha bakah hriselna ngaipawimawh tura in fuihtharna a awm beisei vang a ni,  a ti a. Police tam zawk tel ngei tura sawmin , rah tha a chhuah ngei a beisei tih a tarlang bawk.

Mizoram chu India rama State ralmuang ber a nih rualin ralmuanna hian inthlahdahna a keng tel  fo tih sawiin, Home Minister chuan inthlahdah lo leh in ring renga awm chu Police te nuna bet tlat tur a ni tiin; chutiang rilru pu tur chuan Police zawng zawngte a chah a. Battalion- te dinhmun bakah mahni hna thawk tha duh lo leh thawk thei lote zirchian mek a nih thu  sawiin, Battalion pakhata awm reng theih a ni lo a, a tul dan anga insawn a ngaih chang a awm tiin Pu K. Sapdanga chuan a tul ang zela hmalak a ni ang a ti.

Pu K. Sapdanga chuan Poilce -te chu mipuite entawn ber pakhat an ni a, a bik takin Police hrisel tha leh inthazo chuan mipuite zah an kai hle tiin  mipuite beisei ang ngei a an nun vawng uluk turin a chah a. Mizorama Armed Battalion- 8 zingah, 3rd IR Battalion chu Police ten awm an chakna hmun ber a nih a beisei tlat tih sawiin, chutiang tura hmalak ngaihna kawng hrang hrangah sawrkar pawhin theihtawp a chhuah dawn tiin; tuna awm mek te pawh nuam ti taka awm tur leh ram leh hnam, khawtlang tana tan lo la chhunzawm zel turin a chah nghal a ni.

Pu C. Lalthanmawia, IPS, DIGP (Southern Range) pawhin thutawi sawina neiin, Mizoram Police hnuaiah ' Armed leh Unarmed Police' awm mah ila, inpumkhat vek kan nihna hriat reng a pawimawh hle a ti a. Tun kum kal mekah Police-90 lai kan in chan tawh tih sawiin,  heihian Police - ten hriselna kan ngaihpawimawh thar a tul zia a tilang chiang hle a ti. Mahni hna tha taka thawk thei turin rilru leh taksa hriselna a pawimawh hle tiin  Pu C. Lalthanmawia  chuan Police- te chu zu leh ruihhlo lak a  fihlim tur leh an hriselna ngaipawimawh thar turin a chah.

Pu K. Sapdanga, Home Minister in 3rd IR Battalion a tlawhna inkhawm neihah hian Pu.F. Lalbiakzauva, Commandant, 3rd IR Battalion chuan hun kaihruaiin, kal khawmte lawmna leh battalion dinhmun tlangpui sawina a nei a, Pu Jacob Hlychho, Deputy Commandant, chuan lawmthu sawina neiin hun a  khar.  3rd IR Battalion, hi kum 2007 khan  din tan niin, April ni 12, 2023 khan tuna an awmna Thingkah hi  luah tanin tun dinhmunah mi 304 an awm mek a ni.

Home Minister hian Superintendent of Police, Office Lawngtlai tlawh nghalin, Pu R. Lokeshwaran (IPS) ,SP Lawngtlai leh a thawhpui ten an lo dawngsawng a.

Pu R. Lokeshwaran (IPS) chuan Lawngtlai Poilce te dinhmun tlangpui report pekna  neiin tun dinhmunah Sub- division pahnih- Lawngtlai leh Chawngte awmin, Police Station- 5 awm mekin, Police -131 an awm mek a ni, a ti. Lawngtlai District - in International Border pahnih- Myanmar leh Bangladesh neiin, ramri kaltlanga dan phalloh Silai leh ruihtheihthil tawlh ruk chu Police ten theihtawpin an dang thin a ni, a ti a. Myanmar leh Bangladesh rambuai avangin ral tlan singkhat chuang an awm mek tih a sawi a. Dan leh thupek kenkawh bakah Lawngtlai mipuite ralmuang taka an awm theih nan Lawngtlai Police ten theihtawp chhuahin hna an thawk thin tih a tarlang bawk.

Pu K. Sapdanga chuan Lawngtlai mipuite ralmuang taka an awm theih nana tha thlah lo a thawktu Lawngtlai S.P. leh a thawhpuite fakawm a tih thu a sawi a. Police- te chu khawtlang a muanna awm tura mipuite innghahna ber pakhat an nihna hre reng turin a chah a. Khawtlang mipuite innghah ngamna ni turin Police- te chu hrisel tak an nih a tul hle tih sawiin, theih tawpa mahni taksa hriselna ngai pawimawh thar turin a chah. Lawngtlai Police ten mamawh an neih hrang hrangte pawh Sawrkarin a hriatpui tih sawiin, chak taka hmalak mek a ni, a ti. Police indaihlohna hriaiin sawrkarin Constable- 300 vel la turin hma a la mek tih sawiin, a hlawhtlin ngei a beisei thu a sawi bawk.