1627/2024-2025

2024 Thlazing ni 16: Vawiin chawhma khan Mizoram Sawrkar Horticulture Department-in tun laia Mizoram puma sawhthing tam natna leng mek do tura 'Sawhthing Tam Beihpui' (Ginger Operation) kalpui tura a ruahman chu Lunglei District-a a bul ṭanna (flag off) hun Ṭawipui North-II-ah hman a ni a. Lunglei South bialtu MLA Pu Lalramliana Papuia chuan Khuallian niin hun a hmanpui.

Khuallian Pu Lalramliana Papuia chuan Ginger Operation chu vanduai thila buatsaih mah ni se, kut hna thawktute lam hawia hma lakna a nih avangin phurawm a tih thu a sawi a. Mizoram sawrkarah kut hna thawktute'n beiseina an nghat tih hriain sawrkar pawhin theih tawpin kut hna thawktute hmakhua a ngaihtuah a, kut hna thawktute chu sawrkarin a ngaihthah dawn lo, a ti a. Kut hna thawh lam, a bik takin sawhthing chuan sawrkar thar nen hmehbel a hlawh avangin sawrkar pawh a ṭang hle tih sawiin, social media-a kut hna thawktute tihnual leh tihlauthawng thei zawnga thu thang awm ṭhin karah sawrkar ring ngam a, hlauthawng lo leh beidawng lova phur taka hma lak chhunzawm zel turin kut hna thawktute a chah a. Kut hna thawktute hmakhua turah sawrkar chuan 'Kut hna thawktute beiseina kan tibeidawng thiang lo,' tih thurolum neiin, thlai thar policy chu vei ber pakhatah a nei tih sawiin, kut hna thawktute beiseina tihlawhtling turin department kal tlanga hma lak theihna chin chinah sawrkar chuan theih tawp chhuahin hma a la dawn tih a sawi a. Kut hna thawktute pawhin a taka an hma laknaa an tawn hriat aṭangin department leh sawrkar hotute hnenah a ṭul anga thurawn pek hreh lo tura chahin; mihring thiamna leh taimakna hmanga beih theih piah lamah khuarel chhiatna avanga harsatna awm thei a nih avangin Pathian hnena thlen ṭhin a pawimawh thu a sawi bawk.

Ginger Operation bul ṭanna pual hian Lunglei District huam chhunga Ṭawipui North-I leh Ṭawipui North-II khuaa Chief Minister Hand Holding scheme hnuaia Multipurpose Farming Society member sawhthing ching chhungkaw 136 hnena sawhthing natna hrang hrang - sawhthing ṭawih natna (Ginger Rhizome rot leh bacterial wilt), pangang ei chhiat (shoot borer) leh natna dangte enkawl dan zirtirna training buatsaih nghal a ni a. Lunglei District Horticulture Officer Pu B. Lalzarzova'n hun kaihruaiin, Ginger Operation chungchang a sawi fiah bakah, sawhthing chu enkawl uluk a ṭul thu leh a hun taka sawhthing natna hriat chhuah a pawimawh thu a sawi a. Sr HD Pu C. Laldinthanga'n hunserh hmangin, DHC Pi Liansangpuii Pachuau leh APO Pu Samuel Lalnundika te'n training hi an pe a ni.

Training-ah hian powerpoint presentation hmangin entirna nen hlawhtling taka sawhthing chin dan tur chipchiar tak zirtir an ni a. Sawhthing chinna hmun tur leh a chi thlan uluk chu hlawhtlinna bul a nih thu te, sawhthing chu buh, bean lam chi, bekang leh vaimim te nen chin pawlh a ṭhat viau laiin, bawkbawn leh hmarcha nena chin pawlh erawh chuan sawhthing tan natna a thlen awlsam thu te tar lan a ni a. Lei ṭha hman tur dik taka chhutin ṭul lova sum sen a tihtlem theih dan tar lan niin, lo zau zawng (area) azira lei ṭha hman zat tur chhut dan te zir ho a ni a. Sawhthing natna tlanglawnte leh a hriat chhuah awlsam dan te bakah, a enkawl dan te zir ho a ni bawk.

He hunah hian sawhthing chingtute hnenah Horticulture Department siam ‘Sawhthing natnate, a bawmtu rannungte leh a enkawl dan’ tih lehkhabu leh sawhthing tam venna leh enkawlna damdawi eng emaw zat sem chhuah nghal a ni a. Block Horticulture Officer Pu B. Lalrinmawia'n lawm thu sawiin training hun hi a khar a. Chawhnu lamah Ṭawipui North-II khuaa Pu K. Laldinpuia huanah a taka tih chhinna (field demonstration) buatsaih zui a ni bawk.

Horticulture Department chhinchhiah danin, kumin 2024 hian Mizoramah sawhthing ching chhungkaw 25,102 awmin, Lunglei District chhungah pawh khaw 69-ah chhungkaw 2,431 te'n quintal 10,450 aia tlem lo an ching nia chhut a ni a. April aṭanga May thla inkara an sawhthing linte chu rannung (Ginger shoot borer) leh sawhthing tam/ṭawih (Rhizome rot)-in a beih nasat avangin Horticulture Department chuan he harsatna su kiang tur hian Sawhthing Tam Beihpui (Operation Ginger) a puang nghal a. August ni 13, 2024 khan Horticulture Department-a technical mi thiam zawng zawng koh khawm niin, Directorate of Horticulture, Mizoram, Aizawlah Trainers' Training buatsaih nghal a ni.

He sawhthing tam natna leng mek avang hian Lunglei District-a sawhthing chingtu chhungkaw tam tak pawhin an buai phah mek a. Lunglei District-ah chuan Ṭawipui North-I leh Ṭawipui North-II hi sawhthing tam hluarna khua niin, hma lakna bul ṭan nan hian hman a ni a. District Horticulture Office chuan sawhthing ching khua, Multipurpose Farming Society dinna khuaahte a remchan anga sawhthing tam beihpui thlak programme hi chhunzawm chho zel turin ruahmanna a siam a. Sawhthing tam beihpui thlak programme hi August thla chhung ngeia zo hman turin Horticulture Department-a thawktute chu an feh chhuak chhunzawm nghal dawn a ni.