3170/2023-2024

Mamit the 22nd December 2023 : Vawiin chhun khan Pu K.Sapdanga, Home Minister chuan 4th IR Battalion, Advanced Headquarters, Rengdil tlawhin an harsatnate a hmunah a enpui. Hemi hnu hian ramri sipai duty Thinghlun leh Medilicherra a tlawh bakah, Kanhmun Police Station a tlawh. He hunah hian Pu H Lalengmawia, Home Secretary, Pu C Lalnunmawia DIG (Armed/NR) leh Pu Lalthiamsanga Sailo, Jt. Secretary (Home), VL Remliana, Mamit DC, Pi Lalthangpuii Pulamte, Mamit SP leh Pu Zarzoliana, SDPO Kawrthahten an tawiawm.

Home Minister chuan, "Kan Chief Minister Pu Lalduhoma'n ZPM Party in ni 100 chhunga tihhlawhtlin turte chiangtakin a puang tawh a. Hemi tihlawhtling tur hian theihtawp kan chhuah mek a ni. Tunlaiin kan department, a bik takin police-te hian sawi neuh neuh kan kai viau mai a. Ramri depa duty kan police ten sumdawng leh tualchhung tharchhuah kuhva hring phur chhuaktute pawisa lo lak sak kan ching thin nia sawi a awm fo mai a. Heng thil hi tun atang chuan a thleng tawh tur a ni lo. Mipui veivak ten harsatna an tawk tur a ni lo a, thlamuang taka an awm theihna tura tanpuitu tur kan ni. A tul a nih phei chuan tualchhung tharchhuah Kuhva hring phurtuten kan state chhunga harsatna an tawh lohna turin ramri thlenga a venhim hna thawh inhuam turin inbuatsaih a tul. Mipui harsatna siam zawnga khawsa kan awm a nih chuan sawrkar chuan a en liam mai mai dawn lo a ni tih kan inhriattir a ni," a ti.

Pu K Sapdanga chuan, "Tunhnaiah Burma atangin Kuhva ro mai ni lo, Kuhva hring pawh rawn phurhluh thin a ni tih kan hria a. Tualchhung tharchhuah ni lo chuan Police gate a paltlang tur a ni lo. Chutiang thil a awm chuan man vek tur a ni. Cabinet meeting thuchhuak a nih avangin hemi kawngah hian sawrkar kal khawng a tum hle a, pawisaa insiamrem vanga lo tlang palh an awm kan hriat chuan a mawhphurtu chungah na takin action lak a ni zel dawn a ni. Dan hian a kawng a zawh a tul a, dan phal chin baka pawisa khawn te, mahni mimal hlawkna tura uniform ha emaw ha lo emaw, tumahin ramri leh a chhehvelah pawisa sawrkar hriatpuina tel lovin an khawn tur a ni lo. Sawrkar revenue a lut tur chin chu receipt tel thlapin sawrkarin a khawn mai tur a ni," a ti bawk.