Nikum July 2008-a lak 62nd Batch Recruit Constable, 5th IR. Bn. Mizoram te chu vawiin khan C.T.I. Sesawng hmunah Passing Out Parade an nei a, Home Minister Pu R. Lalzirliana chu Khuallian a ni.
 
 
 
 

Vawiina IR. Bn. Constables lakluh takte chibai bukna chhangin Khuallian Home Minister chuan anmahni lawmpuina thu a sawi a, ram leh hnam tih zahawm a, venghimtu tur an ni tih hre reng turin a chah a ni. Dan leh thupek khauh zawka kenkawh chu sorkarin a ngai pawimawh hle a, chuvangin police-te pawh nasa lehzuala inbuatsaiha, rawih fo an nih tur thu a sawi bawk. IR Bn. te chu Mizoram state sorkar ni lovin sorkar laipui thuhnuaia awm an nih angin India ram khawi hmunah pawh, a tul apiangah kal thei tur an ni, a ti a. India sorkarin state tinah Commando Unit 2 din tur thu a pek bawhzuiin Mizoram Police te pawh hetiang lamah training pek an ni ang a ti. Chhiatrupna engpawh - tui tla, leimin, motor accident - ahte hian police-te inpekna leh tlawmngaihna chu a fakawm thin hle a ni, a ti. Mizo hnam dana kan chhuan em em “Zawlbuk Incheina” - huaisenna, rinawmna, taimakna, hawihawmna  leh midangte tana inpekna thinlung - chu police ten an vawng nung thei ber a, khawtlang leh ram chhanhima, chei vul leh theitu police te an ni tiin Constable tling thar te chu a fuih bawk.

Home Minister Pu R. Lalzirliana chuan Mizoram Police-te chu an nungchang pawh a mawi sawt hlea a hriat thu a tarlang a. Traffice Police ten motor tha taka tlan theihna tur leh kea kalte an himna tur ngaihtuaha rim taka an duty an hlen laiin VIP leh mi pawimawh motor an hmuh apianga salute an pek thin chu thil tul ber a ni lova, traffic felfai leh him taka a kal zel theihna tur chu pawimawh zawkah ngai fo se a duh thu a sawi a ni.

Vawiina CTI Sesawng atanga Passing Out Parade hmang 62nd Batch 5th IR.Bn. te hi a tirah mi 473 an ni a. Vanduaithlak takin an zinga mi 3 chu training laiin Malaria a vangin an boral a; constable 2 chu disciplinary ground-a ban an ni a, constable 2 dangte chu suspend an ni bawk. Tunah hian Dy.Commandant enkawlna hnuaiah C.T.I. Camp-ah hian 5th IR. Bn.-ah thawktu zawng zawng Medical Staff-te telin mi 132 awmin an vaiin Recruit Constables 466-te nen mi 598 an awm a ni.

62nd Batch Recruit Constables Basic Training-a Category hrang hranga ti tha ber lawmman dawngtute chu heng mite hi an ni :

1. Lalringzuala Fanai    -    Governor’s Running Trophy & Gold Medal
                    (Proficiency in best All-Rounder)
2. R.Vanlalrengpuia        -    CM Running Trophy & Gold Medal
                    (Proficiency in Drill)
3. Vanlalchhuanga        -    CM Running Trophy & Gold Medal
                    (Proficiency in Drill)
4. F.Lalrinawma        -    Home Minister Running Trophy
                    (Proficiency in legal Studies)
5. K.Ramengmawia    -    C.S. Running Trophy & Gold Medal
                    (Proficiency in Musketry)
6. F.Lalrinawma        -    DGP Running Trophy & Gold Medal
                    (Proficiency in General Studies)
7. K.Lalrintluanga        -    IGP Running Trophy & Gold Medal
                    (Proficiency in Physical Training)
8. Zoremmawia        -    DIG(Trg.) Running Trophy & Gold Medal
                    (Proficiency in Police Sc., Duties, Orgn, Admn., etc)
9. Lalnuntluanga        -    Commandant Running Trophy & Gold Medal
                    (Proficiency in Exemplary Conduct)

Vawiina 62nd Batch Recruit Constables 5th IR. Bn. Passing Out Parade-ah hian Khuallian Home Minister chu Parliamentary Secretaries Pu Lal Thanzara, Pu Lalrinmawia Ralte leh Pu S. Laldingliana; MLA Pu K.Lianzuala; DGP Pu Lalrokhuma Pachuau leh Police/CRPF/BSF hotu engemawzat ten an rawn tawiawm a ni.
 
 
 
 

Attachment

  • Loading attachment...