Vawiin chawhnu hian Bialtu MLA leh Home Minister ni bawk Pu Lalchamliana chuan a bial chhunga khua Hriangtlang a tlawh a, Hriangtlang Community Hall ah vantlang inkhawm buatsaihin an bialtu MLA atana an thlan tlin avangin lawmthu a hrilh.

He vantlang inkhawm, Pu C. Lianmawia, Vice President, VC kaihhruaiah hian Pu Lalchamliana chuan, khawnawta hmuak lova, khawtlang hruaitu tlemazawng ten zangkhai taka an lo hmuak chu a rilrem zawng tak a nih thu a hrilh a. Kan hnung lawk MLA General Election a Hrangturzo bialtu MLA ni tura an thlan tlin avangin lawmthu a hrilh bawk a ni.  Home Minister chuan, Pathian zarah hetiang dinhmuna hlan kai ka lo nih takah chuan mipuite ta, mipuite tana awm ka ni tih min hriatsak turin ka duh che u a, thleibik nei lovin mi zawng zawng tan hna ka thawk dawn a ni, tiin amah lawmtu Hriangtlang mipuite a chah a ni. Minister hian khawtlang hruaitute pawh mipui huap rorelna fel kalpui tura chahin Democracy rama awm, hunbi neia mipuiten roreltu tur an thlanna rama cheng kan nih avangin mipuite hi an lal ber a, an zavaia huapzo rorelna kalpui hi kan tihmakmawh a ni, a ti. Chutihlaiin, kan ram mipuite zingah moral reformation a awm a tul hle nia a hriat thu sawiin, rinawmna, inzahtawnna leh mi rintlak ni tura kan intuaihriam deuh deuh a tul hle a ni, a ti bawk.

Minister hi a nupui Pi Nuchhungi leh Pu John Neihlaia, IPS, IGP (Hqtrs) te nupain Aizawl atanga an tawiawm bakah Serchhip atangin Pu Chuauhnuna, MCS Addl. DC, Pu H. Lalhruaitluanga, MCS, DLAO, Pu David J. Pyhnadaolai, MPS, SDPO leh Pu K. Saitluanga, IPRO leh official pawimawh dangten an tawiawm bawk a ni.