Vawiin hian Serchhip DC Conference Hall ah Home Minister Pu Lalchamliana, Hrangturzo Bialtu MLA ni bawk chuan Serchhip District a Department hrang hrang Officer te chu inhmelhriatna leh inkawm hona a neih pui a. Langtlang sawrkar, Eirukna awmlohna sawrkar din kan tum a ni tih hi Officer te rilruah cham reng se a duh thu Offier kalkhawm te hi a hrilh a ni.

He inkawm hona, Pu Chuauhnuna, Addl. DC kaihhruaiah hian Pu Lalchamliana chuan, ka hmuh ve chinah Officer inthlah dah deuh tak awm thin mah se, Officer fel leh inpe zo em em tam tak ka hmu thin a, heng mite hian ka rilru an tilawm thin. Officer leh Minister te hnathawh ho kawngah keini MLA leh Minister te kan lal a tawi zawk deuhva, kan intithu deuh zawk fova. Mipui lamin min nawr hi chuan han tihsak leh mai te kan chak mai thin. Chutiang hun a lo awm changin dan anga kalpui a ni em?  Dan in a phal em? tih thuah te a tul anga inhrilhhriat zel nise a tha hle a. Inpawh takin, inhnaih takin hna it hawk ho ang u, tiin a sawm a ni. Ka ngaihdanah chuan Dan hi lal ber fo se, Rule of Law angin kal zel thei ila, ka duh ber fo a ni, a ti. Pu Lalchamliana chuan, Department leh department inkarah inhriatthiam lohna (rivalry) awm thin hi tihbo theih nise a duh hle tih a sawi a, chutihrualin Officer te chu an hnuaia thawkte enkawl kawngah mihring mihrinna zah tak chunga enkawl tha a tih thu a sawi a. Zilh fo pawha awm tha duh chuang lote han hrem mai hi chu, a pawi lutuk pawhin a lang tawh lo a ni, a ti. Ram hnufuala kan buaipui lian ber pakhat Corruption thuah he sawrkar hi langtlang sawrkar, corruption awmlohna sawrkar nih tum tlat sawrkar a ni tih hi in rilruah cham reng se ka duh a ni, tiin officer kal khawmte hi a chah a ni. MLA leh Minister ten en bial kan enkawl ho dawn a, mipuiten mamawh an ngah em em bawk a, zawldawh taka lo dawngsawng thin turin ka ngen che u ani, tiin kal khawm te hi a chah a ni.

Minister in thu a sawi zawh hian Officer kal khawm te chu an ngaimawh zual sawina hun hawn sak an nih angin Serchhip District mipuite mamawh langsar leh lian tham tak tak Minister hnenah hian an sawilang hlawm a ni.

Home Minister hi Pu John Neihlaia, IPS, IGP (Hqtrs) in a rawn tawiawm a ni.