Vawiin chawhnu khan Home Minister Pu R.Lalzirliana chuan Chaltlang Tourist Lodge-ah, sawm a nih angin Aizawl District Football Association (ADFA) General Body Meeting a hmanpui.

Home Minister Pu R.Lalzirliana chuan football chu infiamna chauh ni loin eizawnna leh infiamna dangte ang bawka ruihhlo laka thalaite humhimna bakah hriselna a ni tel tiin Tunlaiah, Mizo thalaite an vanneih tawh thu sawiin khelmual tha tak tak sawrkarin a buatsaih sak bakah, grassroot level atanga zirtirna te pek an ni a, association tha tak tak ten awmze neiin an kaihruai leh zel tawh bawk a ni a ti. Thalaite tana chona awm chhun chu hlawhtlin tum a nih thusawiin chutih ruala pawimawh tho chu hruaitute an ni a. An enkawl mek thalaite tan, kawngtin rengah entawntlakin  nun an tum tlat a ngai a, thalaite tana zirtirtu nih tlin chu thil pawimawh tak a ni a ti.

ADFA General Body Meeting hi ADFA President Pu Robert Romawia Royte'an a kaihruai a, report ngaihthlak niin an pawl hmalakna tur leh hmachhawpte sawiho a ni a. Tun dinhmunah, ADFA chuan Division pathum - 1st, 2nd leh 3rd Divsion-ah te football tournament/league a buatsaih thin a. Zone 7-ah Zone championship, MLA cup leh tournament dangte a buatsaih thin a ni. ADFA hnuaiah hian football club 80 inziak lut a; NECS nen kumin leh nakum chhunga thawhona thuthlung ziak fel tawh in NECS chuan cheng nuai 51 in ADFA hi a tanpui dawn a ni.