Home Minister Pu R. Lalzirliana chu 1.3.2017 khan Kulikawn Indoor Stadium-a F.Zoliansanga 32nd MBA Official Badminton Championship & 16th Inter-District Team Championship kharna hunah khuallian niin, infiamna khawvelah Mizo thalai thiamna leh theihna tha tak tak nei an awm chu chhuanawm a tih thu sawiin, tha thlah lova rinawm leh taina taka kan beih chuan Sawrkar hmalakna nen India rama a ber nihna kan la thei a ni,a ti.
Home Minister, Mizoram Badminton Association Chief Patron ni bawk chuan infiamna khawvelah eng discipline pawh ni se Mizo thalaiten hma an sawn hle a, hei hian ram dang amite nen khaikhin pawhin kan duai bik loh zia a tarlang a, midang tan pawh hei hi chona ni se, a tih thu a sawi a. Chutihrual chuan hlawhtlinna ziktluak nei tur chuan player ten an nun an uluk a pawimawh thu sawiin, ruihhlo laka an fihlim theih nan fimkhur turin a chah bawk.
F.Zoliansanga 32nd MBA Official Badminton Championship & 16th Inter-District Team Championship, 2017 hi March ni 28, 2017 khan neih tan a ni a. Tournament-ah hian Open leh Team inelna a awm a; Open-ah hian category hrang hrang 21 awmin, player 287 an tel a. Team-ah hian category 7 awmin, team 54 an tel bawk. Tournament-ah hian overall champion chu Mizoram Police Badminton Club an ni.
Tournament kharna hunah hian player tithate mai bakah nikum chhunga National leh India hmarchhak level-a Mizoram aiawha tel medal dawngte hnenah lawmpuina hlan a ni nghal a. Heng player zingah hian kum 70 chuang category-a India ram puma pakhatna pawh a tel a ni.
