Nimin khan Sawrkar Laipuia Minister of State for Micro, Small and Medium Enterprises Pu Giriraj Singh chuan Chief Minister Pu Lal Thanhawla chu a chenna in CM Bangla ah hmuin a Ministry in Mizoram tan hmalakna a neih theih te hrilhhriatna neiin mau in Mizoram dinhmun nasa takin a siam danglam thei nia a hriat thu a sawi.

Minister Pu Giriraj Singh chuan industry lam thil siamna emaw, sawngbawlna emaw din duh mimal mahni ke a ding tum te tanpui leh kawng kawhhmuh turin a Ministry-in ram pum District tinah Incubation Centre, vaibelchhe khat zelin a din thei tih sawiin hei hi ngaihven turin Chief Minister a ngen a. Mizoram a aieng leh sawhthing tharchhuah te chu Manipur a aieng leh sawhthing sawngbawlna a Ministry kaltlanga ruahman angin a tih thei ve ngei a rin thu sawiin zir turin Mizoram atanga mi tir turin Chief Minister a ngen bawk a, Dragonfruit leh Mizoram tharchhuah thei leh thlai ah te value addition siam a pawimawh thu Union Minister hian a tarlang bawk a ni.

Chief Minister chuan Ministry of Micro, Small and Medium Enterprises hnuaia project tan sum thawh funding pattern 80:20 chu Mizoram ang tlangram state tan a harsat thu sawiin hei hi ennawn turin Union Minister hi a ngen a, anni chuan ennawn a tiam a ni. Mau in Mizoram hmel a tihdanglam theih a rin thu sawiin Union Minister chuan mau chu sumthawh chhuah nan mai nilo hna tam tak siamna hmanraw pawimawh tak a ni thei a ni, a ti. Chief Minister chuan handicraft leh handloom sector te chu a Ministry kaltlanga tihchangtlun a tul thu a sawi.