Nimin tlaia lo thleng Ministry of Micro, Small & Medium Enterprises changtu Union Minister of State Shri Giriraj Singh chuan vawiin chawhma khan Ailawnga Dragon fruit farm; SFURTI Cane & Bamboo Cluster leh Hnam Chhantu, Republic Veng a mi te a tlawh a. Vawiin chawhnu khan PMEGP tanpuina dawngtu sumdawng zingah VTR Computer Center, Khatla, Teremi Ralte Tailoring,Dawrpui Jail Veng leh COCO Cafe & Restaurant, Ramhlun North te  a tlawh leh a ni. 

Minister chuan Ailawng Dragon fruit farm tlawhin an hmalakna tha a tih thu a sawi a. Dragon fruit hi ramdang atanga lakluh (import) a nih avangin India ramah a man a to hle a. Mizoram hi dragon fruit that duhna hmun, hralhchhuahna tur market tha tak neisa reng a nih avangin Horticulture Department chuan nasa takin tan a la a. Kum 2014-2015 atanga chin tan he farm-a dragon fruit-te hi kum hnih khat a ral leh chuan hralh chhuah tham an thar ngei an beisei a ni. 

Pu Giriraj Singh chuan Republic Venga Hnam Chhantu hmun a tlawhnaah mau hmanga an thil siamchhuahte chu market changtlung zawk neia hralh chhuah tha a ti a. An thil siamchhuahna hmun chu ti lian a,  training centre-ah hlan kai ni se, hetiang lama tui mi, mi 100 bawr vel training theihna tura ruahman a nih theih nan project siam a, sawrkar laipuiin bank leh financial institutions dangte nena thawk hova tanpui dan kawng zawn a tum thu a sawi a ni. 

PMEGP unit hnuaia tanpuina dawngtu zinga a tlawh VTR Computer Centre hi Pi Remtluangi Renthlei enkawl a nia; Thlaruk  Diploma  Course  ah zirlai 150 chuang, hardware zirna leh DTP production an nei a. Teremi Tailoring ah hian fashion designinf zirlai 12 an awm mek a; a neitu chu Pi Teremi  Ralte niin an kutchhuak thawmhnaw te pawh dawrah an zuarchhuak mek a ni. COCO Cafe & Restaurant, Ramhlun North hi Pu Collin G Lalrinkima leh a nupui in an din a ni a. Heng Unit 3 te hian kum khat chhungin Cheng nuai 36 atanga 40 chuang sum an thawkchhuak mek a ni. 

Pu Giriraj Singh chuan PMEGP UNIT hlawhtling taka kalpui a ni chu lawmawm a tih thusawiin PMEGP loan hlawhtlinpuitute chu an thanlen zel theihnan kawngdap pui a inhuam thu a sawi a. State sawrkar, KVIC leh Bank ten sumdawnna lianthamlo atanga bultan tumtu te hlawhtlin nan nasa leh inpawh zawnga an thawhho a pawimawh a ti a. Fashion Designing zirlai leh computer zirlai ten sumdawnna bul an tan dantur an zirlai atangin ngaihtuah tan se; khawi atangin nge bultanna sum an hmuh ang tih ngaihtuahna seng tan se tha a tih thu a sawi a. Mizoram chhunga bank hrang hrang te hnen atanga kawng inkawhhmuhna leh inzirtirna te chu vocational training neimek ten an dawn ngei ngei na turin Industries Department hnuaia DIC leh KVIC ten ruahhman an siamsak a ngai a ni a ti.