Mizoram Public Service Commission kaltlanga Mizoram Civil Service (MCS) Officer 8 leh Mizoram Information Service (MIS) officer 5 lak thar tuna Administrative Training Institute (ATI) ah Foundation Course kal mek ten nimin tlai khan Chief Minister Pu Lal Thanhawla chu a Office ah an hmu a, Chief Minister hian officer thar te fuihin an kal zelna turah duhsakna a hlan a ni. 

Chief Minister Pu Lal Thanhawla chuan officer thar te chu mitlemte zinga an thiamna leh theihna avanga hlawhtlinna an hmu chu a lawmpui tih sawiin an vanneih zia te hriaa Pathian hnenah lawmthu sawi reng tur an ni tih hre fo turin a chah a. Mizoramah chuan Sawrkar hnathawk a bik takin officer hna phei chu vohbik (privileged class) nia ngaih theih ani a, Sawrkar hnathawk te laka mipui beiseina a sang chho zel a, chu an beiseina tihhlawhtlin nan Sawrkar hnathawk ten mawhphurhna (responsibility) leh tihtur (duty) kan nei ani tih hi in hriatchian ka duh a, he hna kaltlang hian Mizoram leh mipuite tan theihtawp in chhuah ka beisei a ni, a ti a. Lehkhathiam rual ni mahse training pawimawh zia te hriaa an training hun chhungin uluk leh chik taka inzir turin a fuih a, tunlai thiamna sang chho zelah engtik lai pawhin mahni intuaihriam a tul zia leh chhiar zau a pawimawh zia te hre turin a chah bawk a ni. 

Officer thar ten in hnathawh professional career bul in tan dawn avangin a tir atangin an hnathawh(career) chauh in ngaihtuah ka duh a, chumi awmzia chu politically neutral in ni tur a ni a. Sawrkar siamtu a rinawm nilovin Sawrkarah rinawm takin in thawk tur a ni, a ti a. Hleih nei lova hnathawh chu mihring tihzahawmtu anih thu sawiin civil service/sawrkar hnathawk chuan tumah duhsak bik nei tur a ni lova, diktakin mi angkhat vekin a en tur a ni, a ti. 

Mipuite hamthatna (welfare program) hrang hrang te chik turin leh insang mara zirchiang leh bihchiang tura fuihin heng program kengkawhtu in ni dawn a, rinawmna (integrity) tak tak nena in thawh kan lo beiseiin mipuiin an thlir reng dawn che u ni, a ti a. Mipui beiseinna sang zel pha turin inzir thar renga intah hriam reng a tul zia te hre turin a fuih bawk. An mawhphurhna a san thu sawiin langtlang (transparency) nen leh mawh la (accountable) chunga in thawh a ngai a, chutih rualin rinawmna leh taimakna nen in thawh phawta theihtawp in chhuah chuan Prime Minister’s Excellence Award in Public Adminstration ang chawimawina te pawh in dawng thei ani tih in hriat ka duhin ka fuih duh che u ni, a ti. Mizorama tlawmngai pawl hrang hrangte leh Sawrkar thawhhona a that thu sawiin hengte hi hriain tlawmngai pawlte nen thawhhona tha neih a pawimawh zia te hre turin a fuih a. Social Media chungchang sawiin Mizote zingah kan uar chho zel a, hengte hi kan hmangsual em tih te chhuta, a nilo zawnga hman loh inzirtir leh thil tangkai anih dan inzirtir te hi a bik takin MIS officer te tan chona lian tak ani tih in hriat ka duh a ni,  a ti. 

Officer thar te chu Mizoram development hnuk (backbone) tak tak a nih dawn thusawiin hawihawm takin an thawhna hmun apiangah mipui leh ram rawngbawl hna thawk turin a fuih a, an kal zelna turah duhsakna a hlan a ni. 

He inkawmhonaah hian Pi Ramdinliani, ATI Director leh Pi Angela Zothanpuii, Joint Director, ATI te chuan Foundation Training Course kalhmang te sawiin Sawrkar hnathawk reng reng tan training a pawimawh zia te an sawi a. MCS bik tan Training dan tidanglamin kumin atangin kum khat chhung an training tawh tur thu a sawi tel bawk a ni. He inkawmhonaah hian Press Secretary to Chief Minister Pu LR Sailo pawhin MIS officer te tan a bik training neih leh exposure tour neih a pawimawh thute a sawi a ni.