Home Minister Pu Lalchamliana chuan vawiin khan District Executive Force (DEF) tan Ni 5 awh tur Basic Disaster Management Training chu 5th IR Battalion Headquarters, Lungverh-ah a hawng. Pu C.Lalruaia, Joint Director (OPS) DM&R Department chuan Training hawnna hi a kaihruai a ni.

Home Minister chuan ram chhunga chhiatna chi hrang hrang hriat lawk lohin a thleng thut thut thin a, hetiang hunah hian Police te chu koh hmasak ber (first responder) an ni thin a, khuarel chhiatna a lo thlenin, Mizo te chu a hnam angin tlawmngai thei leh mite tanpui peih hnam nimah ila, khawvel lo changkang zelah Digital Media hmangin thu a darh chak a, chhiatna a lo thlenin a hmunah mipui pungkhawm an tam viau chang a awm thin a, heng hunah hian chet awlsam zawk nan leh ruahmanna tha neih chungchangah leh invenhimna chungchangah te Police ten mawhphurhna sang tak an nei a ni, a ti a. Nunna chhanhim khawngah te, ruang lak chhuah chungchangah te, fumfe taka ruahmanna siam chu Police te hna leh mawhphurhna a ni, a ti bawk a ni. Minister chuan Training chu Ni 5 chhung chauh ni mah se, zoram mipui tan tangkai taka training course kal chhuak turin leh theihtawpa zir turin trainee te hnenah duhsakna a hlan a ni.

Basic Disaster Management Training hi District hrang hrangah Vawi 4 buatsaih tura ruahman a ni a, a Vawi 1-na Lungverh-ah hian Havildar atanga Inspector Rank mi 22 training pek an ni dawn  a ni. Trainee te hi Champhai District atangin 3, Serchhip District atangin 3, Kolasib District atangin 6 leh Aizawl District atangin 10 an ni a, Mipa 21 leh Hmeichhia 1 an ni.

Training hi N.D.R.F (National Disaster Response Force) Team, Guwahati atanga lokalte leh DM&R Staff ten an neihpui dawn a ni. Training-ah hian accident, leimin, inchim, tuilian, kangmei leh chhiatna chi hrang hrang a thlenin chhiat tawhna hmuna hliamtuar leh tanpui ngaite tanpui dante, chhiat tawhna hmunhma enfel leh venhim dante, kawng hmang nei zawka tanpui ngaite tanpui dante zirtir an ni dawn a ni.

Basic Disaster Management Training hawnnaah hian NDRF atangin Ajay Kumar leh Sargal Mal, DIG Training Pu RA Sanjeev, SP Training Vikram Singh, 5th IR Battalion Commandant Pu Lalbiaktluanga, DM&R Director Pu F.J Liantluanga leh midangte an tel a ni.