Tukin khan Chief Minister Pu Zoramthanga hovin CM Cabinet Meeting Room ah village level a khawtlang inrelbawlna thuamthat, Reformation of Mizoram Rural Administration chungchangah Local Administration Department hotute nen sawiho a ni. He hunah hian LAD Minister Pu K. Lalrinliana leh Drafting Committee member te an tel a ni.

Drafting Committee hian Sikkim a khawtlang inrelbawlna an kalpui dan te zirchiang in, Panchayati Raj Institution (PRI) leh tuna Mizoramin Village Council System a hman mek khaikhin, rawtna an siamte vawiin CM hova meeting ah hian an chhawp a. Tuna Mizoramin VC inrelbawlna chu hmun thenkhatah siamthat ngai lai awma an hriat thu te sawiin, PRI dungzuia felfai zawka siamdanglam thei lai te rawtna siam a ni a. Tha zawka hna an thawh theih nana khawtlang hruaitute chu thuamchak a tul thu te sawiin, PRI kalphung angin district level a advisory body siam te, sawrkar hmalakna hrang hrang inthuah a awm loh nan a kalphung mumal tak neih te, sum hman leh sum vawn Dan felfai zawk a awm theih nana in kaihhruaina mumal zawk siam a audit neih thin te a huam tel a ni.

Tun dinhmunah hian Mizoramah Village Council 534 (seat 2260) a awm a ni.

Mizoram Rural Administration Reforms Drafting Committee ah hian Ex-minister Pu Liansuama, Pu Rodney L. Ralte, Secretary, leh LAD a hotu dangte bakah MZU leh SIRD a mithiamte an tel a ni.