No.6981/2020-2021
Vawiin hian Home Minister Pu Lalchamliana, bialtu MLA ni bawk chuan a bial chhung khua, Khawlailung daia Ralkahkawn Bazar te, Leng khuaa Khualbuk leh Ambulance te a hawng.
Leng a panna kawngah Pu Lalchamliana hian Khawlailung dai, Ralkahkawna Rurban sum leh MLA Fund hmanga sak Ralkahkawn Bazar chu a hawng a. Chhungkaw 10 velin kumtluana eizawn nana an hman theih tur Market Building thar an nei chu a lawmpui hle tih hrilhin tangkai zawka an hman zel theih nan duhsakna a hlan a, Khawlailung tana sawrkarin hmasawnna tur hmalakna a neih thenkhatte tarlangin Rurban atang vek hian Tui zem te leh fu chingtute tan Fu herna khawl te pawh ngaihtuah mek a ni, a ti. He bazar sak dan hi Pu H. Lalhruaitluanga, MCS, BDO, E. Lungdarin a sawifiah a, Rurban sum Rs. 4.70 lakh leh bialtu MLA Pu Lalchamliana fund Rs. 50000 te hmanga sak a nih thu a tarlang a ni.
He mi hnu hian Lengah Leng khawtlangin an lei Ambulance thar leh khawtlangin an din Leng Khualbuk a hawng leh a. Ambulance thar leh Khualbuk thar hawnna hi Khualbuk tualah buatsaih zui a ni.
A lawmna inkhawmah hian Home Minister chuan, vawiina Lenga kan lo kal chhan hi ka ngaipawimawh hle a, sawrkar tanpuina ngawta innghat lova khawtlang mipuite inpekna rah duhawm tak kan hawng thei hi a chhuanawm a ni, a ti. Pu Lalchamliana chuan, Leng atangin mi chhuanawm leh hmingtha tak tak an lo chhuak tawh thin a. Vawiin mite pawhin anni ang bawka entawn tlak nih zel tumin inthawk niin ka hria a, ka lawm hle a ni. Chumi zarah chuan khawfai ber lawmman in dawnga, tuihna humhalh tha ber lawmman te in dawnga, Village Council inenkawlna kawngah entawn tlakin hna in thawk a, village council tha leh fingvar tak, bialtu MLA tan pawha thawhpui nuam tak in lo nei bawk a. Khaw chhuanawm tak in ni, a ti. Ambulance thar chu Leng khaw tan chauh nilo, thenawm khuate tana hman theih tura an duan a beisei thusawiin, khualbuk te pawh Leng tlawhtute tan a tangkai hle dawn a ni, a ti a. Minister chuan Lengin hmasawnna a la dawng chho zel dawn tih tarlangin tun sawrkar kum thar atangin BADP pawh Lengah kalpui leh anih tur thu a sawi a, Rurban atangin Tuizem pawh chhungkaw 70 an pek thuai tur thu a tarlang bawk. Khawtlang tana inlungrual taka thawkho zel tur chahin Politics hi pawl inbeih nana hmang lova hmasawnna tura thawhhona hmun atan zawka hmang thin turin a chah a ni.
He hun hi Pu B. Vanlalfinga, VCP Lengin a kaihruaia, Ambulance leh Khualbuk an neih dan sawiin Ambulance leina sum zaa sawmruk (60%) chu Automobile Dealer Association of Mizoram (ADAM) in Corporate Social Responsibility (CSR) hmanga an rawn thawh niin a dang zaa sawmli (40%) hi chu vantlang ram Jio Company in tower dah nana an luahhawh man tlingkhawm te, State Finance Commission Grant, VC in an thawh ve atanga an hlawh te hmanga an tum ve a nih thu a tarlang. Khualbuk erawh chu Pu D. Thangliana bialtu MLA anih laia a fund Rs. 2 lakh a bul atan tawh, chumi sum chuan a hmun turte puahchah a ni a. SIRD lamin Panchayati Learning Centre a min thlan zara an sum min pek Rs. 5 lakhs te, VC in sum an dap khawmte leh mi tlawmngaite thilpek hmangtein an sa tih a sawi a. Heng zawng zawng a lo puitlin chhan chu khawtlang mipuite lungrual taka kan thawh ho vang a ni, a ti. Ambulance chu Leng khua chauhni lo khaw thenawmte tan pawha hman theih tura ruahmanna siam anih tur thu a sawi a, a hman man tur erawh tuna an la bithliah fel loh thu a tarlang. Khualbuk chu a ruala mi 7 thlen theihna niin Pindan pahnih chu riah man Rs. 400 a ni a, a dang chu Rs. 200 man an ni. An Ambulance leh Khualbuk a hawn sak avangin Home Minister te nupa chungah leh a tawiawmtu Pu John Neihlaia, IPS, IGP (Hqtrs) te nupa te leh midangte chungah lawmthu a sawi a ni.
He hunah hian Pu John Neihlaia, IPS, IGP (Hqtrs) te, Pu H. Lalhruaitluanga, MCS, BDO, E Lungdar te leh midangte pawhin thusawina hun an hawng a ni.
