No.6982/2020-2021

Aizawl, 21st December, 2020 : Vawiin khan Deputy Chief Minister Pu Tawnluia’n Khawzawl District lawmna puala Souvenir buatsaih chu a office ah a tlangzarh a. Sports & Youth Services Minister Pu Robert Romawia Royte leh MLA dang 4 - Dr. Z.R.Thiamsanga, Pu C.Lalmuanpuia, Pu K.Pachhunga leh Pu Zothantluanga te bakah Khawzawl District Deputy Commissioner hmasa ber Pu H.Lianzela leh Khawzawl Welfare Committee leh khaw tana mi pawimawh dang te pawhin Souvenir tlangzarhna hun hi an hmanpui a ni.

Pu Tawnluia chuan thu sawiin kum 2019 Budget session ah Chief Minister in district thar 3 hawn nan sum nuai 150 dah a nih thu a puan atangin district tharin a ken tel tur ramri leh thil pawimawh dangte buaipui nghal a ni a. August ni 12, 2019 ah RD Minister Pu Lalruatkima’n Khawzawl DC Office chu hawngin November ni 6,2019 ah Chief Minister Pu Zoramthanga hovin Khawzawl District lawmna ropui taka neih a ni a. District thar hawn atanga tun inkar ah ringawt pawh hian Khawzawlah Sport leh UD&PA Department leh department dang hnuaiah te hmasawnna hmel thar thahnem tak hmuh tur a awm hman a ni, tiin Khawzawl mipui ten hun rei tak District hran nei tura kawng hrang hranga an beihna lo hlawhtling ta chu a lawmpui thu a sawi a. District thar nei tura beitute leh an tuarna te hriat reng a ni tih a tarlang.

Pu Tawnluia chuan ram tana rawngbawl tura amah thlangtu mipui ten damlohna avanga a inenkawl chhung zawng pawh duhsak taka tawngtaina nen an dinpui tlat avanga a lawmzia sawiin a tana mi tam tak tawngtaina avangin ram leh mipui te tana hna thawk thei leh turin Pathianin chakna a pe nia a hriat thu a sawi a. Khawzawl District nei tura mipui ten an beihna ah vawi tam tak hlawhchhamna leh beidawnna hial pawh lo tawk thin tawh mah se, tuna district thar hian mipui te rilru ah phurna leh beiseina thar te a siam a, he district huam chhunga cheng mipui te inkarah pawh inlungrualna leh thawh hona tha a thlen ngei a beisei thu a sawi.

Souvenir tlangzarh inkhawm hi Pu P.C.Rosiama, Chairman, Souvenir Sub-Committee in a kaihruai a. Sports Minister Pu Robert Romawia Royte leh MLA dangte pawhin thu sawiin Khawzawl mipui te an lawmpuina leh duhsakna an hlan a ni.