Vawiin khan Home Minister Pu R. Lalzirliana chuan Champhai District chhunga Fisheries hnuaia 3rd leh 4th Phase hnuaia beneficiary 143 hnenah 1st Installment tanpuina a sem. He hun, I&PR Auditorium-a buatsaihah hian Champhai North bialtu MLA, Parliamentary Secretary Pu TT Zothansanga chu khualzahawm niin, Champhai DC Pu Vanlalngaihsaka chuan hun hi a kaihruai a ni.

Minister chuan NLUP tanpuina chu thawk tha duhtu tan chuan malsawmna a ni tih chu a lo dawng hmasa te atangin a hriat theih thu a sawi. A hmang tha duhlo te pawhin an thawh that lo rah an hmuh mek thu a tarlang a. NLUP tanpuina chu hleih nei miah lovin a ti puitling thei tur hnena pek a nih thu sawiin, tun tum a tanpuina dawng zingah ti tha duhlo an awm a nih chuan 2nd installment atang chuan an chanpual an dawng tawh dawn loh thu a sawi a. Tanpuina dawn hi mahni hmuh tur sa dawng ve reng anga inngaih hi thil dik a ni lova, beneficiary ten kan tih tur kan tha thawh chu kan hlen ve ngei tur a ni, a ti a ni.

Khualzahawm Parliamentary Secretary Pu TT Zothansanga chuan tanpuina dawngtute hnenah chuan sangha khawi chu eizawnna tur atan an thlan anih angin dinchhuahpui ngei tum turin a chah a. Ran vulh dang nen a inan loh vang ringawta chaw pek leh enkawl kalphungah ngaihthah mai lo turin a fuih a. Champhai sangha tui zia chu mi hrilh fak a ni thin a, amaherawh chu intodelh tura farmer ten tan an lak a la ngaih thu sawiin, NLUP hian mitin a huap thu leh, a huap te chuan tha taka an tih a beisei thu a sawi a ni.

Vawiin a 3rd leh 4th Phase hnuai 1st installment sem hi dil siamna atam ruahman a ni. A semna hun hi Champhai DFDO Pu Lalthanzuala in lawmthu sawiin ha khar a. Chawhnu lamah beneficiary-te tan hian "Construction and Maintenance of Aquaculture Pond" tih thupui hmangin FEO Pu K. Lalrinmawia chuan zirtirna a pe a ni.