NH 44-A a Sairang Sihhmui lei (Bailey Bridge) ni 2 Dec 2015 zan dar 10 bawr vela AMW Truck (ke 12 nei) MZ-01 J 0741 in a zawh laia a chim avang leh a driverin nunna a chan phah avangin Mizoram PWD chuan pawi a ti tak zet a, lusun chhungte a tuarpuiin, hliam tuar, a handyman pawh a that leh thuai a duhsak tak zet a ni tih MPWD chuan a thuchhuahah a tarlang a ni.
He lei hi nikum khan a lo chim tawh a. He kawng hi kawng pawimawh tak anih avangin hmanhmawh taka hmun hrang hranga lei siamna bungrua te lakhawmin dawh that leh a ni a; chuvang chuan a phurh theih chin load pawh ton 15.5 (quintal 155) chauh ni tura ruahman a ni nghe nghe a. Motor lian san zawng pawh 3.5m (feet 11.5) aia sanglo tura tih a ni. Lei sir tawn tawnah hemi hriattirna (signboard) pawh tar ve ve a ni a, chanchinbu ah te pawh tih chhuah a ni.
He lei chungchang hi Ministry of Road Transport & Highways ah a thar tha zawk dawhna tur pawh dil niin, sanction pawh hmuh a ni tawh a, tun thal chhunga dawh zo hman tura hma lak mek a ni.
Nizana lei zawh chimtu truck hi rora phur Aizawl lam pana kal a ni a, a thil phurh hi tuiah a tlak deuh vek avangin a phurh zat dik tak hriat a harsa tawh a, mahse hetiang truck hian full body ah chuan 25 cubic metre ( a rih zawng 43.5 ton/ 435 qtl) a phur thei a. A body chanve pawh phur se a load rih zawng chu 22 ton / 220 qtl vel tihna a ni a. Hetiang truck hi ama rihna ngawt pawh 8.64 ton(86.4qtl) a ni a, a body zahve pawh phur se ama rihna nena belhkhawm chuan phurh theih zat bituk ai pawhin ala rit zawk hrim hrim a, chuvangin lei hian a dawl lova, a chim ta a ni.
A bula Permanent Bridge dawh lai hi Aizawl lam hnaih foundation hnuaiah lung sakhat lo, tuiin a ei hek theih a awm avangin a foundation tana pawi thei tur hmuh belh leh anih avangin, Ministry of Road Transport & Highways ah tih that leh dil a ni a, consultant rawihna turin tender nimin mai khan hawn a ni a, hei hi pawm anih veleh tih that leh tur a ni.
Lei hi rang taka dawh tha leh turin hma lak nghal a ni a, dawh that leh anih hma chuan Buichali lamah kal angai dawn a, mipuite hriatthiamna MPWD chuan a ngen nghal bawk a ni.
