Nimin 11.4.2016 khan Home Minister Pu R. Lalzirliana chuan Champhai Bazaar-a Police Beat Post thar tur ruahman chu a hmunah a enfiah. Home Minister hi Parliamentary Secretary Col (Rtd.) Z.S Zuala, AMC Councillor Pi Zomuanpuii leh Pi K. Lalhmingliani, RD Department hotute bakah Champhai DC, Addl. SP, PD, DRDA leh District Office hotu thenkhat ten an tawiawm a ni.

Police Beat Post thar sak hna hi BADP atanga thawh tura ruahman a ni a. Home Minister hian Champhai Police Station tlawh in police-te nen inkawmhona a nei a. Agriculture Office Complex, DRDA Office leh Excise and Narcotics Office hmun tlawh bawkin, hnathawktute kawmin, an hmalakna te a enpui nghal a ni.

Home Minister hian sorkar hnathawkte chu thawhhona tha tak an neih a duh thu sawiin, mipui rawngbawl hna ah theihtawp chhuah turin leh hnathawh reng rengah in vil ngun a, quality tha ngaipawimawh turin a chah a. Office hrang hrang a tlawh te chu faina kawngah hma an la hlea a hriat thu sawi telin, invawng zel turin a chah bawk a ni.