Nimin chhun dar 12:30 khan Champhaia cham mek Home Minister Pu R. Lalzirliana chuan New Champhaiah Badminton Hall sakna tur lungphum a phum a. Home Minister hi Parliamentary Secretary Pu TT Zothansanga bakah DIG (Northern Range) Pu C. Laldina, Champhai District Bawrhsap Pu Vanlalngaihsaka, IAS leh District thuneituten an tawiawm a ni.

Badminton Hall sakna tur lungphum phum paha thusawiin Home Minister Pu R. Lalzirliana chuan Sport chu mi tamtak tan eizawnna a ni a, eizawn nana hmanglo tan pawh a thlawna hriselna lei theihna a ni a ti a. Mizoram sawrkarin infiamna lama hmasawnna turin nasa takin hma a la mek a, Olympic ah mi tam tak tir theilo mahila kan Olympic Vision chu a hlawhchham tihna a ni lova, mi pakhata hlawhtlinna kan chan tawh bakah sawrkar hmalakna avangin a hlawhtlinna kan la hmu chho zel dawn a ni a ti bawk.

He hun hi Pu Lalnunmawia, CDBA President in a kaihruai a. Badminton Hall hi court pathum awm theihna tura ruahman a ni.