Nimin chawhnu dar 2 khan Champhaia cham mek Home Minister Pu R. Lalzirliana chuan cheng nuai 20 senga sak, Champhai DRDA Office Recreation Centre cum Rest House a hawng a. Rest House hawnna programme hi DRDA Office tualah neih niin Parliamentary Secretary Pu TT Zothansanga bakah DIG (Northern Range) Pu C. Laldina, Champhai District Bawrhsap Pu Vanlalngaihsaka, IAS leh District thuneituten an tawiawm a ni.

Recreation Centre cum Rest House hawngtu Khuallian Pu R. Lalzirliana chuan ei leh bara intodelh chu hnam zahawmna a ni a, sawrkar chuan mipuite dawm kan a tum mek a, sum leh pai hmanga kuthnathawktute kan puih loh chuan kan hnam hian dinchhuah tik a nei lovang tih hi kan sawrkar chuan a a hria a ni ti. Mizoram Sawrkarin HPC te nen inbiakna a kalpui thu tarlangin, Autonomous District Council sawrkarin a pek theih loh thu leh sawrkar duhdan chiang chiang taka kan puan hnuah inbiakna kalpui a ni a, mipuite nghahhleh ang ngeia inremna tluantling kan neih ngei ka beisei a ni, a ti bawk.

Thusawitu dang, Home Minister tawiawmtu Pu TT Zothansanga chuan zirna lama thangharh a pawimawh thu sawiin India Civil Services a Mizo thalai tamzawk an luh theih nana hma la sauh sauh turin kalkhawmte a fuih bawk.

Recreation Centre cum Rest House hawnna inkhawm hi Champhai District Bawrhsap Pu Vanlalngaihsaka, IAS in a kaihruai a. Pu Lalthankima, JE, DRDA in technical report a pein DRDA Project Director Pu C.C. Lalchhuangkima’n lawmthu sawiin hun a khar a ni.

Recreation Centre cum Rest House sak hna hi kum 2015 khan tan a ni a. 1056 Sq. Ft. a lian niin Table Tennis khelh theihna tur ruahman tel a ni bawk. He hunah hian Champhai MJA te, Champhai khawpui chhung VC hrang hrang aiawh te, Sub-Headquarters YMA, MHIP leh MUP te, leh District Sports Committee sawm an ni bawk.