Nimin zing dar 7:30 khan Home Minister Pu R. Lalzirliana chuan Champhai Fire Station Building a hawng a. Home Minister hi Parliamentary Secretary pahnih - Pu Lt.Col. Z.S. Zuala leh Pu TT Zothansanga bakah DIG (Northern Range) Pu C. Laldina, Fire & Emergency Services Director Pu Neihchungnunga, leh District Bawrhsap Pu Vanlalngaihsaka, IAS hovin District thuneituten an tawiawm a ni.

Champhai Firestation Building hawnna Programme puala inkhawm tawi, Circuit House-a neihah thu sawiin khuallian, Home Minister Pu R. Lalzirliana chuan a Department chan hrang hrangah thawktu indaihlohna nasa tak karah thawktute inpekna avangin duty tihbahlahna a awmlo chu lawmawm a tih thu a sawi a. Dik leh rinawm taka hnathawh a tul thu sawiin ram leh hnam hmangaih dan tur dik tak chu ram tan asset tha leh rotling siam a ni, a ti bawk. Kangmei chhuah nikhuaa tlawmngaia thawkchhuak thinte chu kangthelhna hmanrua tur thawhchhuahpui nachang hre thar tur leh kangthelhtute tana hnawksak mai nilo turin Home Minister chuan a chah bawk.

Khuallian tawiawmtu Parliamentary Secretary Col. Z.S. Zuala pawhin ram tih kan duai duai chu a zahthlak thusawiin mipuite chu kangmei chhuahlo tura fimkhur turin a chah a. Kangthelh hna chu inzir uluk ngai tak a nih thu leh mockdrill ngaihpawimawh a tul thu te, kangthelh kawngah mipui control a pawimawh thu te a sawi bawk. Khuallian tawiawmtu dang, Parliamentary Secretary Pu TT Zothansanga pawhin Champhaiin Home Minister chak tak leh Department thawktute inpekna zara Champhaiin Firestation changtlung tak a nei thei ta chu lawmawm a tih thu a sawi bawk.

He hunah hian Fire & Emergency Services Director Pu Neihchungnunga’n inlawmna thu a sawi a, H. Lalnunpuia, SDO, Project Sub-Division-III, PWD hnen atangin technical report ngaihthlak niin Fire & Emergency Services Addl. Suptd. Of Police Pu Narayan Thapa chuan lawmthu sawiin a khar a ni.

Champhai Firestation Building tharah hi kum 2012 December atanga sak tana ni a, Cheng nuai 224.614 sengin March 2015 khan sak zawh a ni. Firestation ah hian Water Reservoir, tui litre 14500 dawng siam tel a ni bawk. Firestation Building-ah hian thawktute chenna quarters te, Office leh Barrack te, duty room te, bungrua leh POL dahna tur bik te leh garage te a awm a ni.