1210/2023-2024

Siaha 20th July 2023: Vawiin khan Deputy Commissioner of State Tax Office, Siaha Building thar Meisatlah chu Home Minister Pu Lalchamliana, Taxation Department changtu nibawk chuan khuallian niin a hawng.

Hawnna inkhawm Conference Hall-a neih ah hian khuallian chuan Siaha mipuiten tangkai taka an hman tur leh Mizoram sawrkar chhawrtlak tak ni turin Office building thar chu a hawng tih a sawi a. Mizoram intodelhna turin chhiah pek leh khawn that a pawimawh a, sawrkar pawhin theihtawp a chhuah mek zel a ni, a ti. Sawrkar Office chu mipuite ta anih thu tarlangin nuam taka Office an dawr theihna turin thawktute chu dawr nuam taka hnathawk tur leh Office bungrua te pawh uluk leh duat taka enkawl thin turin a chah a ni.

Pu Lalchamliana Taxation changtu Minister chuan District Council leh UT hun lai khan Taxation Department ngaihpawimawhna a hniam hle a, kum 1988 May Ni 20-a Excise leh Taxation Department a hrang a dah anih khan chhiahkhawn lamah hmasawnna hmuh tur a awm tan a, kum 2013- ah Assistant Commissioner of Tax Office hawn niin tun dinhmunah Commissioner of Tax in Mizoram chu awp mekin Deputy Commissioner of Tax Office chu District pariat ah awm tawh in District thar pathum ah hawn tum mek niin, Additional Commissioner of Tax leh Deputy Commissioner of Tax post khat ve ve siam tawh niin UDC leh LDC post pathum ve ve siam a ni tawh bawk tih sawiin hei hian chhiah khawn lamah hmasawnna thar a thlen dawn ani, a ti.

Taxation changtu Minister chuan July ni 1 2017 atang a Goods and Services Tax (GST) hman anih khan nasa takin Mizoramin chhiah a khawn pawh a pung a ti a. Kum 2017-2018 khan GST ah cheng vaibelchhia 424.91 hmuh niin kum 2022-2033 khan cheng vaibelchhia 1020.66 khawnchhuah leh niin Budget- in chhiah khawn tur a tih chu a khum a ni a ti a. Tax petu leh rim taka a khawn hna thawktute chungah lawmthu a sawi a ni. Sawrkarin chhiah a hmuh chu mipuite tan hman leh thin anih thu tarlangin buhfai, tui leh kawlphetha chu tlawm zawkin mipuiten an lei theih phah thin a, hei vang hian chhiah pek leh a khawn kawngah inthlahdah theih a ni lo a ti.

Ram leh mipui thang mek zelah sawrkara chhiah pek tur tih mipuiin an hre mek a, hei hi thil lawmawm tak a nih rualin sawrkar Department-te pawh tun aia nasa zawk a tan la turin a chah a. Ram leh hnam intodelh lo chu miten an zah lo fo tih sawiin hnamzahawm tak ni turin intodelh a ngai a, Mizoram intodelhna tur a tha taka chhiah pe zel turin kalkhawmte leh Mizoram mipuite a sawm nghal a ni.

Pu Vanlalchhuanga, Principal Secretary, Taxation Department chuan Mizoram tana tangkai tak ni tura Taxation Department Office thar Hawn a ni chu lawmawm a tih thu sawiin, chhiahkhawnna kawngah nasa zawkin Mizoramin hmasawnna a hmuh a beisei tih a tarlang a. Pu Lalhmunsanga Hnamte, Deputy Commissioner, Siaha District pawhin thusawiin Siaha mipui tan hmelthar thlentu pawimawh tak a ni tiin Mizoram sawrkar tan Office pawimawh tak a ni, a ti.

Pi Malsawmdawngliani, Sr.EE, Lunglei Building Project Division chuan Technical Report peiin, building saknan hian SPA (Plan) hnuaiah cheng nuai 408.37 hmuh niin contractor atan Malsawmtluanga, Chaltlang, Aizawl chu thlan a ni, a ti a. Hnathawh hi Ni 25 October 2019 ah tan niin Ni 15 November 2022 ah zawhfel a ni a, Ni 7July 2023 khan Taxation Department hnenah hlan fel a ni, a ti bawk. Office Building zauzawng hi 426.56 sqm niin, Type I & III Quarters 359.18 sqm a zau leh Type IV Quarter 90.69 sqm a zau a awm tel bawk a ni.

Vawiin Deputy Commissioner of State Tax Office Building thar hawnna inkhawm hi Pu R. Zosiamliana, Commissioner of State Tax chuan kaihruaiin kalkhawmte lawmna thu a sawi nghal a, Pu H. Vabeitha, Deputy Commissioner of State Tax, Siaha chuan lawmthu sawina neiin inkhawm hi a khar a ni.

Home Minister Pu Lalchamliana hian Superintendent of Police Office, Siaha a tlawh nghal a. Pu V.L. Lura, SP Siaha chuan lo dawngsawngin Siaha Police hmalakna hrang hrang bakah an mamawh te Home Minister hnenah hian a lo thlen a ni. Home Minister chuan Siaha Police te hmalakna leh hnathawh fawkawm a tih thu tarlangin an harsatna sutkian a nih theih nan hmalak a nih tur thu a sawi a. Police te chu mipuite thlamuantu, khawtlang nuam leh ralmuang siam tura tangkai tak an ni tiin mipui leh sawrkar tana an tangkaina te hrereng chunga hnathawk thin turin a chah a ni.

Home Minister hi Pu John Neihlaia, IGP leh Pu Lalhmunsanga Hnamte DC, Siaha ten an tawiawm a ni.