Aizawl Art Gallery & School of Fine Arts-in kum 10 an tlin lawmna Programme hmasa ber atana an buatsaih Duet Painting Exhibition chu vawiin chawhma khan Home Minister Pu R. Lalzirliana'n Aizawl Art Gallery, MUP Building-ah a duh apiang tlawh theih turin a hawng.

Exhibition hawngtu Home Minister chuan Aizawl Art Gallery-in kum 10 a tling ta chu a lawmpui thu leh harsatna tam tak kara an tih hram hram thinna chu fakawm a tih thu a sawi a. Artist-te hian an ngaihtuah leh vei zawngte mi dang hmuh theih leh hriat theih turin an pho chhuak a, lunglen hnemtu leh lungngaih nia mi tihlimtu an ni tiin, art chu hlut thiam deuh deuh a pawimawh a ni, a ti. Mizoram-a lemziak man to tak taka lei ngam an awm ve ta zel chu artist-te’n hma sawn zel tura ke an pennaah nasa taka puitu a nih thu sawiin, Home Minister chuan art hi ram leh hnam ropui tehna pakhat a nih avangin artist-te chu ram tana an hlutna hre renga taihmak chhuah zel turin a ngen a ni. Aizawl Art Gallery-in artist-te tana Art Workshop buatsaih tura kawng zawnpui tura an ngenna chu Home Minister Pu R. Lalzirliana chuan hmalakpui a inhuam thu a sawi bawk.

Aizawl Art Gallery neitu Pu Tanpuia chuan kum 10 an tlin lawmna chu kum tluana kalpui a nih tur thu sawiin, Blood Donation Camp buatsaih an tum thu te, artist-te tan Exhibition & Art Workshop buatsaih an tum thu leh naupang rilru a tha zawnga kaihruai thei tur lemziak eng emaw zat naupang enkawlna Home hrang hrang tana pek chhuah an tum thu a tarlang a ni.

Duet Painting Exhibition hawnna inkhawm hi Mizoram Art Development Society (MADS) General Secretary Pu Vanlalhriata chuan kaihruaiin, sawrkarin lemziak mite hmasawnna tura hma a lakna chu an hlawkpui thu leh hma an sawnpui thu a sawi.

He hunah hian Aizawl Post leh Aizawl Art Gallery te thawh honaa kum 2015 chhunga Aizawl Post-a naupangte kut chhuak tih chhuaha lawmman pakhatna dawng tura thlan Liansangpuii hnenah Aizawl Post Joint Editor Pu PB Lalrammawia’n lawmpuina thuziak leh pawisa fai Rs 1,500/- a hlan a. Home Minister Pu R. Lalzirliana pawhin Liansangpuii hnenah hian lawmpui nan Rs. 2,500/- a hlan bawk a ni.

Pu Tanpuia leh Tv R. Lalruatkima te’n Duet Painting Exhibition an buatsaihah hian lemziak 65 – Oil on Canvas, Water Colour, Charcoal leh Pencil Drawing te pho chhuah a ni a. Exhibition hi February ni 27 (Inrinni) thleng neih a ni ang a; zing dar 10 atanga zan dar 7 thleng tlawh theih a ni ang.