Vawiin khan ram pum huap National Immunization Day (NID) pualin Champhai-ah pawh hun hman niin, DC Pu Vanlalngaihsaka chu khuallian a ni a. He hun, Champhai Vengsang YMA Hall-a hman hi Dr C. Zirliana, CMO Champhai chuan kaihruaiin, Intensified Pulse Polio Immunization (IPPI) pekna hun leh nu naute hnena zeng hri danna pek pawimawhzia inhrilhriat a ni.

DC chuan India ram pumah zenghri hi kum thum lai chu awm tawhlo a ngaih ni mahse kan thenawm hnaih ramah te a la awm reng avangin leh inkalpawh reng kan nih avangin he hri hlauhawm tak hi kan ramah a la tawn lut thei ani tiin, zenghri danna lak chu ngaihpawimawh a tul thu a sawi a. Zenghri danna bakah vaccine dangte Sub-Centre a pek theih zawng zawngte chu lak kim vek a pawimawhthu kalkhawmte hnanah chuan sawiin, tunlai hun changkang chho zelah school tha a lut tur chuan Vaccine Card-te thil tel an phut thin thu te DC Pu Vanlalngaihsaka chuan a tarlang a ni.

CMO Dr. C Zirliana chuan Health Department hmalakna hrang hranga pawimawh tak pakhat - nausen kum tlinglo a thi zat Infant Mortality Rate (IMR) tihhniam leh hri danna (vaccine) pek chu thil kalkawp tlat a nih thu a sawi a. IMR hi ram changkang leh chankanglo tehfung pawimawh tak a nih thu sawiin, Sorkarin a thlawna a sem hri danna hrang hrangte hi kan fate dawn tir nachang kan hriat hian ram changkanna atan ke kan penna kawng khat a ni thei a ni, a ti.

Vawiin National Immunization Day pual hian khawchhunga naupang kum 5 hnuai lam te hnenah zenghri danna round 2-na (kumin atan a vawi hnihna) sem a ni a. He hunah hian SMO leh DIPRO bakah thuthar lakhawmtute an tel a ni.