He thu hi Health & Family Welfare Minister Pu Lal Thanzara chuan tukin zingkara Dinthar Veng vengchhung inkalpawhna, ‘Hipheia Road’ a hawnnaah a sawi a. Minister chuan mipui hman theih tura Hiphei Road a hawn bakah Mizoram Youth Commission-in IAS leh SSC Coaching Centre atana a buatsaih, Govt. Primary School-I, Dinthar, building tlawhin hmalakna kal mekte a en pui bawk. Minister hi MYC Chairman, East Tuipui bialtu MLA ni bawk Pu T. Sangkunga leh Dampa bialtu MLA Pu V. Lalrobiaka-te’n an tawiawm a ni.

Khuallian Heath Minister Pu Lal Thanzara chuan kawng hawn puala inkhawm tawiah thu sawiin hmasawnna chu a hmu duh tan chuan Department-tinah, a te leh a lian hmuh tur a awm reng a ni, a ti a. Aizawl leh Lengpui inkar lei dawh mek pawh March thla chhunga dawh zawh tum a ni a, Ministry of Road Transport and Highways sum hmanga siam a nih avang erawh chuan duh angin a thawh hmanhmawh theihloh tih a sawi bawk. Khuallian chuan Pu Hipheia’n MP a nih laia Dinthar Veng vengchhung inkalpawhna kawng atana bul a lo tanpui tawh, vengchhung mi MLA Pu T. Sangkunga leh Pu V. Lalrobiaka bakah Aizawl West II-a Congress MLA candidate Dr. Lalmalsawma-te thahnemngaihna zara kawng tha tak siam zawh a hawn theih a ni ta chu lawmawm a tih thu sawiin kawng tha nei tura veng mipuite leh Hiphei Road Welfare Committee-ten sawrkar nen thawhhona tha tak an nei chu fakawm a tih thu a sawi bawk. Minister chuan Dinthar veng khawtlang hruaituten hmun an pek theih chuan Health Sub-Centre sawrkarin a pek tur thu kalkhawmte hmaah a sawi bawk.

He inkhawm tawi hi Local Council Member Pu T. Rohmingliana’n a kaihruai a. Local Council member Pu Lalhlupuia Sailo chuan ‘Hipheia Road’ siam dan leh senso report a pe a. ‘Hipheia Road’ hi Pu Hipheia’n MP a nih laia MP Fund a pek hmanga bul tan a ni a. KM chanve a thui niin chhungkaw 180 vel tan chak lakna kawng pawimawh tak a ni. Metre 2.7 a zau leh inches 4-a chhahin kawng hi Cement concrete hmanga siam a ni a. Sik leh sa in her danglam zelin a tihbuailoh nan Iron rod 16 mm hman a ni a, feet 12 dan zelah block siam a ni bawk. He kawng hi mihring 737-in ni 18 chhung an siam a, January ni 21, 2016 khan an zo fel a ni. Aizawl West II-a Congress MLA candidate Dr. Lalmalsawma chuan Mizoram sawrkarin Aizawl West II huam chhunga a hmalakna hrang hrang tarlangin lawmthu sawiin hun a khar a ni.

Kawng hawnna-ah hian MLA pahnihte bakah Local Council hotute, YMA hotute leh Party lama hotu thenkhat leh Hiphei Road Welfare Committee-te an tel a ni.

Kawng hawn zawh hian Health Minister chuan MYC-in Mizo thalaite tan civil services coaching leh skill development training centre atana a buatsaih Govt. Primary School-I, Dinthar, building chu a hmunah a tlawh nghal a. MYC Chairman Pu T. Sangkunga leh Officer-ten lo dawngsawngin hmalakna kal mek leh hmachhawp hrang hrangte Minister an lo hrilh fiah a ni. MYC Chairman chuan IAS leh SSC Coaching class neihna tur room-te fanpuiin Delhi-a IAS Coaching class neih mek chu Satellite hmangin Minister hi entir a ni a, Optional class room-te chu optional class awmloh lai chuan skill development training neih theihna tura ruahman a nih thu a lo hrilh bawk.

MYC hian Govt Primary School-I, Dinthar building-ah IAS leh SSC tan coaching a buatsaih dawn a. Coaching class kal turte chu written test leh interview hmanga thlan fel an ni tawh a. Heta tlingte chuan Mizoram Youth Commission Office, Secretariat Complex, Khatlah naktuk atangin admission tih tan theih a ni ang. IAS coaching atan course fee hi mi pakhat tan Rs. 80,750 niin, sawrkarin Rs. 60,000 a tum ang a, Rs 20,750 chu zirlai tum tur a ni a. SSC coaching atan erawh chuan course fee hi mi pakhat tan Rs. 12,000 niin, sawrkarin Rs. 9,000 a tum ang a, Rs. 3,000 chu zirlai tum tur a ni thung. IAS tan bik Optional subject pathum, Geography, Sociology leh Public Administration-ahte coaching pek a ni bawk ang. Class hi March thla, chawlkar khatna atanga tan tur a ni bawk.