2249/2024-2025

Champhai, 27th September 2024: Vawiin khan Home Minister Pu K. Sapdanga chuan Dungtlang Police Station a tlawh a. Dungtlang PS a thawktute nen inkawmna neiin, venhimna kawnga hmalakna ṭha zawk neih dan tur an sawiho a ni. 

He hunah hian Home Minister chuan Police-te chu ram venhimna kawnga hmahruaitu an ni tih in hre reng turin a chah a. Dan leh thupek kenkawh kawngah hna an thawh chak theih nan khawtlang leh tlawmngai pawl hruaitute nen inlaichinna ṭha neih a pawimawh tih hre reng turin a chah bawk a ni.

Dungtlang Police Station hi January 9, 2020 khan din a ni a. A hnuaiah hian khaw 19 a awm a, Farkawn Beat Post an enkawl bawk. Tun dinhmunah thawktu mi 11 - Sub Inspector - 1, Asst Sub Inspector - 1, Head Constable - 2, Constable - 5, Naik - 1 leh Driver - 1 an awm. Kum 2024 chhung hian Case 27 an ziak lut tawh a, heng zingah hian ND&PS Act hnuaiah Case 4 leh Kuhva ro Quintal 135 an man te a tel a ni.

Home Minister hi Pu Dennis Vanlallura, Dy. SP (Hqrs) leh official dang ten an ṭawiawm a ni.